Халдавырлыг брюцеллез аарыгдан аараан мал-маганның илерээни-биле Чөөн-Хемчик кожууннуң Хорум-Даг сумузунуң чоогунда Чиңге-Даг деп черде чарлаттынган карантин уламчылавышаан. Ооң-биле холбаштыр республиканың Ветеринария албаны август айның эгезинде халдавыр нептерээн черниң мал-маганын дагын катап хынаар.
Чадаанада кожууннар аразының ветлабораториязы Чиңге-Даг деп черде турар хууда дузалал болгаш фермер ажыл-агыйларының бода малынга шинчилелдерни чоруткаш, оларның 72-зинден брюцеллезтуң им-демдектерин илереткен.
Хамык биоматериалдарны шинчилээниниң түңнелинде брюцеллезтуң өөскүдүкчүзү бар беш баш бода малды тодараткан. Оларның дөгерезин согар. Республиканың Ветеринария албаны бодунуң дужаалы-биле айыттынган девискээрге карантинни чарлаан болгаш халдавырга удур хемчеглерни ап эгелээн. Халдавырның нептерелин бодурбазы-биле ажыл-агыйларның оран-саваларын дезинфекциялап, хораннап эгелээн. Халдавыр өөскээн черге мал-маганның ыңай-бээр аргыжылгазын, ынаар киир сөөртүлгезин база оон үндүр сөөртүлгезин хораан. Эки түңнелдер алдынгыже чедир ук хоруглар күштүг болуп артар.
ТР-ниң Чазааның медээзинден А. ХЕРТЕК белеткээн.