Коломна хоорайның Конькижилер төвүнге октябрь 6–14 хүннеринде XIV делегей чергелиг “Коломнаның бырыстаазы–2023” (Коломенская верста) деп шыдыраа фестивалынга 30 региондан 500 ойнакчы киришкен.
Фестивальдың программазында 4 хевирниң турнири болган. Аңаа бистиң республиканың Кызыл хоорайда Немелде өөредилге төвүнүң башкызы база Россияның күрүне инструктору деп аттың эдилекчизи Сергей Түлүштүң бичии өөреникчилери шупту шаңналдыг черлерни алгаш, хамыкты кайгаткан.
Бичии шыдыраачыларның мурнундан тренер башкызы Сергей Түлүш Москвада Тываның төлээ черинге, тыва аныяктарның оралакчы президентизи Аганак Монгушка, сенатор Дина Оюнга бичии шыдыраачыларны деткээни дээш өөрүп четтиргенин илереткен.
Программа езугаар фестивальга дөрт бөлүктүң турнирлерин эрттирген. А тур- нир — шыырак дээн 9, 11, 13, 15 харлыг 179 элээдилер аразынга “Бүгү-россия чергелиг турнир”. В турнир – опен-турнир. С турнир – Москва облазының блицке Кубогу. Д турнир – Москва облазының дүрген шыдыраага Кубогу.
Баштай А турнирге 13 харлыг кыс уруглар аразынга Анастасия Ооржак мөңгүн база 15 харлыгларга Арина Иргит хүлер медальдарга төлептиг болганнар. Дараазында С биле Д бөлүктүң турнирлеринге ол-ла уруглар 2 хевирге чараш оюнну көргүскеш, 1-ги черни ап, чемпионнар болганы улуг чоргаарал. Улуг ойнакчылар аразынга 2 дугаар опен-турнирге 18 харлыг Болат Бадыраа 2 дугаар черни ап, мөңгүн медальды шаңналга алган.
Фестивальдың түңнелинде Арина Иргит биле Анастасия Ооржак Москва облазының Шыдыраа чөвүлелиниң президентизи Сергей Карякинниң холундан тускай байыр чедирген шаңналды алганнар.
Улаштыр Москвада ВДНХ-га, Шыдыраа эвилелиниң ажык турниринге дүрген ойнаар шыдырааның Д биле Е бөлүктеринге Полина Иргит биле Ачыты Күжүгет тиилекчилер болганы база катап тренер башкы Сергей Тюлюштуң эки белеткелин бадыткап турар. Бичии шыдыраачыларывыс Москвадан келгеш, республиканың бирги чери дээш шыдыраа маргылдаазынга бирги черлерни алгаш, ам Сибирь девискээриниң бирги чери дээш маргылдааларда белеткенип эгелээннер.
Эрте-бурун шагдан тура тыва кижи нарын, шириин бодалдыг мерген шыдыраа оюнунга ынак чорааны амгы үеде бистиң чаш ажы-төлүвүсте салгал дамчып келген деп болур. Дагдыныкчы башкының күзели база соңгаар ат-алдарлыг тренерлерниң сүмелээри болза, Кызылга тускай угаан-медерел сайзырадыр база шыдыраа талазы-биле тускай спорт школазын ажыдары.
Чоннуң мурнундан бичии чемпионнарның ам-даа хей- аъды бедип, хөй-хөй чедиишкиннерлиг болурунга йөрээл салып курайладывыс.
Алексей ЧАМБАЛ-ООЛ.
“Шын” №83 2023 чылдың ноябрь 1
