Бүгү-россияның «Орус географтыг ниитилел» деп хөй-ниити организациязының Тывада регион салбырының Харалгазыкчылар чөвүлелиниң составын болгаш санын тодараткан. Ооң дугайында республика Баштыңының чогуур айтыышкыны бо неделяда үнүп келген.
Харалгазыкчылар чөвүлели 18 кежигүннүг болур. Чөвүлелдиң дугайында дүрүмге дүүштүр кежигүннерни ооң даргазы тодараткан. «Орус географтыг ниитилелдиң” идепкейжилериниң саналдааны-биле дарганың албан-дужаалын Тываның Баштыңы Владислав Ховалыг ээлээн. Оон аңгыда, чөвүлелче ТР-ниң Чазааның оралакчы даргазы Владимир Донских, Бүгү-россияның «Орус географтыг ниитилел» деп хөй-ниити организациязының Тывада регион салбырының Кара-кыс Аракчаа, РФ-тиң Федерация Чөвүлелиниң кежигүнү Дина Оюн болгаш чамдык яамыларның, чагырга черлериниң, улуг бүдүрүлгелерниң төлээлери кирген.
Ук айтыышкын-биле Харалгазыкчылар чөвүлелиниң дугайында дүрүмнү бадылаан. Аңаа дүүштүр ооң кол сорулгазы болза, «Орус географтыг ниитилелдиң» Тывада регион салбырынга бюджеттен дашкаар акша-хөреңгилер-биле бодунуң төлевилелдерин боттандырарынга дузалажыры болур. «Чазак командазының болгаш «Орус географтыг ниитилелдиң» идепкейжилериниң ажыл-чорудулгазын чаңгыс аайлаштырары чугула. Оларның эксперт үнелелинге даянып алгаш, өөредилге-кижизидилге, бойдус камгалалы болгаш туризмни хөгжүдер адырларны таарыштыр эде-хере тыртып болур апаар бис» – деп, Владислав Ховалыг санап турар.
Бүгү-россияның «Орус географтыг ниитилел» деп хөй-ниити организациязының Тывада регион салбыры 1974 чылда тургустунган. Эрткен чүс чылдың 90 чылдарында ооң ажыл-чорудулгазы ара соксааш, 2001 чылда катап дирилген. Тывага ооң боттандырган төлевилелдериниң бирээзи – 2011 чылдан тура үзүктел чок эртип турар бүгү делегей чергелиг "Кызыл – Курагино" археология-географтыг экспедиция болур. Ооң сорулгазы – Кызыл – Курагино демир-орук шугумунуң девискээринде культура болгаш төөгү өнчүзүн кадагалап арттырары.
А. ХЕРТЕК белеткээн.
Чуруктарны интернеттен алган.
“Шын” №82 2023 чылдың октябрь 28
