Тускай шериг операциязынче гуманитарлыг дуза чорудар ажылдар уламчылавышаан. Кызыл хоорайның Спутник микрорайонунда техника септээр «СТО»-да ТШО-же чорудар автомобильдерни автомеханик Григорий Боковенко септеп турар.
– Тускай шериг операциязынче чорудар автомобильдерни септээрин дилээрге, чөпшээрешкеш, кылып турарым бо. Бодумнуң өмүнээмден бичии-даа болза дузам болзун. Автомобиль кылыр ажылды бичиимден тура эгелээн мен. Автомобильдиң канчаар тургустунганын, чүзү үрели берип болурун дыка эки билир мен. Бо автомобиль үр үениң дургузунда ажыглалга турбаан хире чорду. Хавырткан машиналарның байдалы аңгы-аңгы боор, көңгүс анаазы-даа, элээн шыңгыы септелге хереглээри-даа бар. Эккелген машиналарга техниктиг шинчилгени эрттиргеш, чедер-четпестерин кылып тур бис. Ниитизи-биле алырга, капиталдыг эвес, а бичии үрелиишкиннер бар болду– деп, Григорий чугаалады.
Улусчу фронтунуң Тыва Республикада салбырының төлээзи Владимир Журавлев автомеханиктерге четтиргенин илереткен: «Бир дугаарында, автомобильдерни септеп кылып турар мастерлерге өөрүп четтиргеним илередир-дир мен. Июнь 25-те ТШО девискээринче автомобильдер чорудары планда көрдүнген. Бо хүнде чамдык автомобильдер дайынчы хөделиишкиннер девискээринче аъттаныптарынга белен, а бир чамдыызын ам-даа септеп турар. Бо «СТО»-нуң мастерлери машиналарга артык кезектер садар деткикчилерни боттары тыпкаш, септээр ажылдарны кылып турлар. Автомашиналарын берген албан черлеринге база өөрүп четтиргенимни илередир-дир мен. Июнь 25-те чоруур автомашиналарның чамдыызы албан черлериниң үндүр бижээни, а бир чамдыызы хавырткан машиналар болуп турар.
ТШО-да чаңгыс чер чурттугларывыска дузалажыр аргаларны өөренип көрүп турар бис. Дайынчы хөделиишкиннер девискээринде амгы үеде чүү болуп турарын шупту билир бис. Чаа техника келирге, олар өөрүшкү-биле уткуп-хүлээп ап турар. Ылаңгыя техника оларга чугула херек.
Ынчангаш өске-даа чаңгыс чер чурттугларымны гуманитарлыг дуза кадарынга киржир күзелиңер бар болза, Улусчу фронтунуң Тыва Республикада салбырынга чедип келирин азы дараазында 8(39422)2-10-50 дугаарже долгаарын сагындырып тур бис.
Автомобиль септээр черлиг хууда сайгарлыкчылар акша-төгерик-биле эвес-даа болза, ТШО-же чорудар автомобильдерни белеткеп, техниктиг шинчилелди кылып, чедер-четпестерин септээринге дузалажып бээринче кыйгырып тур мен.
Ол ышкаш артык кезектер садыгларының ээлерин база кыйгырар-дыр бис. Артык кезектер-биле дузалаар болза, дыка-ла эки болур ийик».
Амгы үеде 10 хире автомобильди Республиканың суд приставтар албан чери Улусчу фронтуга дамчыдып берген. Ол автомобильдерни хоорайның аңгы-аңгы «СТО»-ларында септеп, чаартып турар.
Улусчу фронтунуң төлээзи Чодураа Чаш-оолдуң медеглээни-биле алырга, июнь 25-те дайынчы хөделиишкиннер девискээринче чорудар автомобильдер аңгы-аңгы чылдагааннарның уржуундан хууда хамаатылардан хавырган техника болуп турар. Хөй кезиинде, эзирик машина мунуп чорааш туттурган чолаачылар автомобилин хавыртып турар. Эзирик байдалга руль артынга олурупкаш, шагдааларга туттурар болза, айыыл улуг дээрзин сагындырары артык эвес.
Айдың ОНДАР.
Ада ТЮЛЮШТУҢ тырттырган чуруу.
«Шын» №46 2024 чылдың июнь 22
![](https://sun9-27.userapi.com/impf/m0GZDCWhvPmOYu2LjrrspLIMZTcVfRIEQdEhow/mXy4nwng7eI.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=fab2949ba345deb653f9b353b70cbb45&from=bu&u=u9GDzPWLPn6jE-DjegyoGJ7TC5c6bCK_LIAg7AR_QFs&cs=807x605)
![](https://sun9-32.userapi.com/impf/2mLijTzC7rAlp8ayA5UPFUbihmfKufV5cc3ESQ/0V_VaEZ03kc.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=93e3f4868a40c5224b0338a13037bebc&from=bu&u=0RSWLYfp-fAEeh6dhZKCsTJI3T9xyUh4VfF9xjB-mMY&cs=807x605)
![](https://sun9-26.userapi.com/impf/ix_787t6JosQvm6h35sNGgmggXTD9W0GClgNRg/eka32p6fiUE.jpg?quality=95&as=32x43,48x64,72x96,108x144,160x213,240x320,360x480,480x640,540x720,640x853,720x960,960x1280&sign=9150ea2d2c5966479c72a1f082fe0420&from=bu&u=S8XqpjGnaB7Bhoiubhpg8i72nZfhbkShPY2VxJ3VCuQ&cs=605x807)
![](https://sun9-47.userapi.com/impf/TDA9fU3FBSq87ft1J_rwCe_pG3CjOB69KlgIJA/Uoza9UIAkBE.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=e1c2df97dffa2eda89f6a578183e4efd&from=bu&u=2cP7-m9uFaDOdLCy0oinmlsdpxnTCHCVLQ9nv6Vjoow&cs=807x605)
![](https://sun9-43.userapi.com/impf/ArmdnWL0BCX2tYDqKOWXNoyQ_hdcPQTFSDJseA/VyT9849dxyY.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=737e0df881665e90edecabafc6d07e43&from=bu&u=KWS_cxR9uaegKBWDkZJ0Gqx1D01lJm5s9Z-IJTK59KI&cs=807x605)
![](https://sun9-55.userapi.com/impf/ScZ-aLDdc3D9Kv15ykCuIfeRrcMb0frWcfiqYg/3zcZ51eqfMw.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=6634792b6f4b68fb3695bcc54ebdf2e7&from=bu&u=7FaAOIu72lrjs4pcs_AroL8QlyBLDT_qJRA5N40Ztls&cs=807x605)
![](https://sun9-64.userapi.com/impf/sgBjfyXR0HQvflmUQDlp_ALiKAK3CjpR6mNoFg/R_U-6qdGgTU.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=4f78df2756408f7cfb768a21fc44adfa&from=bu&u=V9HYOjkZLFBqmQS4zTbCN0WqGCmtVVmAZZqo8TLWQVY&cs=807x605)