Январь 18-те “Тайга” станциязынга хоочун хаакчы Долаана Биче-оолдуң 50 харлаан юбилейинге тураскааткан Республика чергелиг хаак маргылдаазы болуп эрткен. Ук маргылдааны Тываның Хаак спортунуң база Тываның Олимпийжи чөвүлелдери болгаш юбилярның дөргүл-төрели, эш-өөрүнүң деткимчези-биле бедик деңнелге эрттирген.
Маргылдааның ажыдыышкынында ТР-ниң Олимпийжи чөвүлелиниң удуртукчузу Кудес Зайцев база Хаак спортунуң чөвүлелиниң төлээлери, дөргүл-төрели, эш-өөрү Долаана Тараачыевнага байыр чедирген чылыг-чымчак сөстерни чугаалап, белек-селээн сөңнээннер.
Долаана Биче-оол 1974 чылдың ноябрь 17-де Чадаана хоорайга төрүттүнген. Ол школачы чылдарында-ла хаак-биле өңнүктежир салымныг болган. 1991 чылда Чаа-Хөлдүң ортумак школазын дооскаш, Кызылдың башкы институдунуң күш-культура салбырынче кирип алган. 1997 чылда институтту чедиишкинниг дооскаш, аңаа-ла күш-культура башкылап ажылдап эгелээн. Дараазында 2002–2021 чылдарда ОБЯ-га өрт камгалалының килдизинге улуг диспетчеринге чедир ажылдааш, пенсияже үнген. Амгы үеде "Сүбедей" спорт школазында ажылдап турар. Өөнүң ээзи Дээди Хуралдың депутады Буян Биче-оол-биле 2 ажы-төлдүг база 2 уйнуктуг.
Долаана Тараачыевна “Тыва Республиканың күш-культура болгаш спорттуң тергиини” деп хөрек демдээниң эдилекчизи. Хөй чылдар иштинде спорттуң кышкы хевирлерин сайзырадырынга киирген улуг үлүг-хуузу дээш ТР-ниң Чазааның болгаш Дээди Хуралдың хүндүлел бижиктери-биле шаңнаткан.
Маргылдааның киржикчилери хаакчылар боттарының хемчээлдеринге шалыпкын маңнашкаш, эки үелерни көргүскеннер. Түңнелинде, дараазында тиилекчилерни болгаш шаңнал кирген спортчуларны шаңнап-мактаан.
Херээжен хаакчылар: 18 хар чедир назылыг элээдилер аразынга 1-ги черни Алдын-Сай Донгак (Таңды), 2–3-кү черлерни — Асель Бегзи-Хуурак (Бии-Хем) база Кристина Куулар (Таңды); 19 хар чедир 1-ги черни Долума Донгытпай (Таңды), 2–3-кү черлерни — Ангелина Ярина (Тожу) база Ай-кыс Кыргыс (Кызыл); 31 харга чедир 1-ги черни Чойганмаа Монгуш (Кызыл), 2–3-кү черлерни — Айлана Байыр-оол (Кызыл) база Сайдана Сат (Кызыл); 41 харга чедир 1-ги черни Октябрина Чыртак-Уруг (Таңды), 2–3-кү черлерни — Айдыс Ондар (Кызыл) база Айлаңмаа Хоюгбан (Чаа-Хөл); 56 хар чедир херээжен хаакчылар аразынга 1-ги черни Агафья Баяндай (Кызыл), 2-ги черни Светлана Саян-оол (Кызыл) алган.
Эр хаакчылар: 76 харлыг спортчулар аразынга 1-ги черни Владимир Долгополов (Каа-Хем суур), 2-ги черни Анчыкай Маады (Чаа-Хөл); 66 хар чедир 1-ги черни Алексей Оюн (Таңды), 2–3-кү черлерни Олег Көк-оол (Чаа-Хөл) база Доржу Күжүгет (Таңды); 56 хар чедир 1-ги черни Олег Саяты (Таңды), 2–3-кү черлерни Орлан Салчак (Кызыл) база Владимир Казаков (Улуг-Хем), 46 хар чедир 1-ги черни Роман Саяты (ОБЯ), 2–3-кү черлерни Шолбан Дандар (Кызыл) база Буян Салчак (Кызыл); 36 хар чедир 1-ги черни Чойган Доржу (Чаа-Хөл), 2–3-кү черлерни Орлан Түлүш (УФСИН) база Андрей Сарым-оол (Чаа-Хөл); 19 хар чедир аныяктар аразынга 1-ги черни Өлзей-Бады Доспан (“Дөгээ”), 2–3-кү черлерни Дөрбет-оол Доржу (ОБЯ) база Дөнен-оол Доржу (ОБЯ); 18 хар чедир 1-ги черни Эдуард Лахов (Таңды), 2–3-кү черлерни Эдуард Оюн (Таңды) база Сайынбек Сарыглар (Таңды) алганнар.
Тиилекчилер болгаш шаңнал черлерже кирген хаакчыларга медальдар, грамоталар база акша шаңналдарын тывыскан.
А.ЧАМБАЛ-ООЛ.
“Шын” №3 2024 чылдың январь 30








