Октябрь 1-де улуг назылыглар хүнүнге тураскааткан шыдыраага база тыва хүреш маргылдааларын бодунуң 70 харлаанынга тураскаадып, тыва спорт хоочуну, билдингир күрүне ажылдакчызы, хөй-ниитижи Сергей Ооржак эш-өөрү, өг-бүлези, төрелдери-биле демнежип эрттиргеннер. Бо маргылдааларны чылдың эрттирерин чугула деп шиитпирлээннер.
“Шыдырааның мергеннери” деп маргылдааны сентябрь 8-те “Континент” садыг-саарылга бажыңының оран-савазында шыдыраа клувунга 2 бөлүкке – 60-70 хар аразынга база 70 хардан өрү ойнакчыларга эрттирген. Бир дугаар бөлүкке 19 ойнакчы швейцар хемчээл-биле 7 салыгны 5 минута иштинде дүрген шыдыраага база 70 хардан улуг 7 ойнакчы долгандырыг салыг ойнаар деп маргылдааның кол шииткекчизи Сергей Түлүш чарлаан. Дүрген шыдырааның түңнелинде I дугаар черни – шынар талазы-биле 7 санныг хоочун шыдыраачы Ховалыг Иргит (Кызыл), II дугаар черни – 7 санныг Айдың Ондар (Кызыл), III дугаар черни 6,5 санныг Артур Монгуш (Сукпак) үлешкен. 70 хардан өрү 2 дугаар бөлүктүң долгандырыг салыынга шаңналдыг черлерниң доозазын Кызылдың шыдыраачылары ээлээн: I дугаар черни – Федор Дамбиев, II дугаар черни Саавин Ондар, Сергей Ооржак. Шаңналдыг черже кирген хоочун шыдыраачылар кол деткикчиниң холундан тускай белектерни алганнар.
Пенсия назылыг хоочуннар аразынга “Мөгениң эриг чүрээ” деп тыва хүреш маргылдаазын октябрь 1-де “Херел” спорт залынга мөгелерниң дилээ-биле 3 бөлүкке чарып эрттирген.
Баштайгы 55 – 60 хар аразында мөгелерниң хүрежинге шүүлген мөге Кызыл кожууннуң Арзылаң мөгези Алексей Салчак, үжүүрлешкен мөге Эрзинниң мөгези Кыргыс Вадим, 3-кү черни хостуг хүрешке ССРЭ-ниң спорт мастери Оюн Станислав үлешкеннер.
Ийи дугаар 61 – 65 харлыг бөлүктүң мөгелериниң хүрежи солун, көрүштүг болган. Шүүлген мөге Тываның Арзылаң мөгези Кызыл кожуундан Владимир Монгуш, үжүүрлешкен мөге Улуг-Хем кожууннуң “Арзылаң” мөгези Андрей Биче-оол, III-кү черни Чөөн-Хемчиктиң мөгези Вадим Ооржак алган.
Үш дугаар 66 хардан өрү бөлүктүң мөгелеринге I-ги черни Чөөн-Хемчиктен Василий Ондар, II-ги черни маргылдааның башкарыкчызы Маадыр Биче-оол, III-кү черни Чадамба Мөнге үлешкеннер.
Шаңналдыг черлерже кирген мөгелер база тиилелгеже чүткүл, чараш арга дээш Кызыл кожууннуң мөгези Николай Монгуш, чараш арга дээш Кызылдан Николай Бяков тускай шаңналдарны маргылдааның кол деткикчизи Сергей Ооржактың холундан алганнар.
Маргылдаа үезинде база соонда хоочун мөгелер боттарының үзел-бодалдарын үлежип, хоочуннар аразында спортчу маргылдааларны үргүлчү эрттирерин саналдааннар. Хоочуннар аразынга спортту деткири дээрге-ле аныяк-өскенге улуг өөредиг, үлегер болуп турарын Сергей Ооржак демдеглээн. Ол бодунуң ажылдап чораан үезинде “Тыва спорт” деп сеткүүлдүң үнүп турганын чугаалап, амгы үеде Россияның спортчуларын Европа, делегей, Олимпий оюннарынга киирбейн турар үелерде, спортчуларны деткиири-биле, иштики маргылдааларны эрттирери чугула деп медеглеп, ол бүгүнү тускай сеткүүлге деткикчилерниң дузазы-биле чырыдары чугула деп чугаалаан. Маргылдааларны эрттиреринге дузалашкан Тываның Спорт яамызының, спорт школаларының удуртукчуларынга база өске-даа деткикчилерге өөрүп четтиргенин илереткен.
Алексей ЧАМБАЛ-ООЛ.