Хоорай ыттарын халас акталаар

Кызыл хоорайныӊ Ветеринария эргелели ыттарны халас акталаар талазы-биле акция чарлаан.

«Кудумчуда, ылаӊгыя хуу бажыӊнар чанында ыттарныӊ хөй кезии ээлиг ыттар дээрзин специалистер чугаалаан. Черлик ыттар-биле холбашкан берге айтырыгны шиитпирлээр дээш, хоорай чагыргазы бо программаны эгелеп турар. Азырал дириг амытаннарны чиигелделиг акталаар программа бар, а шуут халас акталаар черлер хоорайда чок. Улус бо акцияны ажыглап, ыттарын акталадыр боор дээрзинге идегеп турар бис» – деп, Кызылдыӊ чагыргазы медеглээн.

«Күзелдиг кижи бүрүзү бодунуӊ ыдын эккелгеш, акталадып ап болур. Акталаан соонда, ыт бүрүзүнге хамаарыштыр медээлерни Чаӊгыс аай даӊзыже киир бижиири-биле, оларга чип салыр бис» – деп, ук эргелелдиӊ даргазыныӊ оралакчызы Айлаӊ Ооржак тайылбырлаан.

Кызыл хоорайныӊ Ветеринария эргелелиниӊ адрези Оюн Күрседи кудумчузу, бажыӊ 6. Харылзажыр телефону: 2-95-11.

Кызыл хоорайныӊ чагыргазы дириг амытаннар дажыглап сөөртүр тускай транспорт садып алган.

Р. ДЕМЧИК.