Арага-дары аймаан дыштаныр болгаш байырлал хүннеринде, ол ышкаш ажыл хүннеринде хүндүс 15.00 шактан тура дараазында хүннүӊ 11.00 шакка чедир садары хоруглуг.
2011 чылдыӊ ноябрь 11-де үнген «Тыва Республиканыӊ девискээринге алькогольдуг продукцияны үүрмектеп садарын курүнениӊ таарыштырарыныӊ болгаш алкогольдуг продукцияны ажыглаарын (ижерин) кызыгаарлаар дугайында» ДХ-I 295 дугаарлыг ТР-ниӊ хоойлузунда ону айтып каан.
Эрткен неделяда Улуг-Хемниӊ муниципалитеттер аразында килдизиниӊ № 5 полиция пунктузунуӊ участок төлээлери Чаа-Хөл суурнуӊ кезек садыгларын хынап турган дээрзин республиканыӊ ИХЯ-зыныӊ парлалга албаны дыӊнадып турар.
«Аккыржак» деп садыг сентябрь 30-де кежээкиниӊ 18.00 шакта «Крепость Сибири» деп 1,3 литр пивону хоойлуга чөрүштүр садыпкан. Полицияныӊ ажылдакчылары болур-чогуур документилери чок 26 пивону хавырган.
«Федералдыг хоойлуда тодарадып кааны ёзугаар бүдүрер болгаш садып-саарар чөпшээрелин шынзыдып көргүзер документилери чок алкогольдуг продукцияны садып-саарганы» деп РФ-тиӊ Административтиг эрге-хоойлу хажыдыышкыннарыныӊ дугайында кодекстиӊ 14.16-гы чүүлүнүӊ 2 кезээнде көрдүнген корум-чурумну үрээниниӊ демдектерин илереткен.
«Виктория» деп садыг октябрь 1-де кежээкиниӊ 18.00 шакта «Крепость Сибири» деп 1,3 литр дөрт пивону хоойлуга чөрүштүр садыпкан. Полицияныӊ ажылдакчылары ук хажыдыышкынны демдеглээш, садыгдан 35 пивону хавырган.
«Хостуг садып-саарарын хоруглуг азы кызыгаарлаан барааннарны хоойлуга чөрүштүр сатканы» деп РФ-тиӊ Административтиг эрге-хоойлу хажыдыышкыннарыныӊ дугайында кодекстиӊ 14.2-ги чүүлүнде көрдүнген корум-чурумну үрээниниӊ демдектери тодараттынган.
Арага-дары аймаан хоойлуга дүүшпес ёзу-биле садып-саарар чоруктарны болдурбас дээш, баш бурунгаар кичээндирер сорулгалыг профилактиктиг рейдилерни полиция уламчылап турар.
