Чаа чыл байырлалыныӊ хуулгаазын илби-шидизинге бүзүреп чоруур хенче чаштарныӊ сагыш-сеткилин өөртүп, ачы-буян чедирер «Күзелдер шивизи» акцияны беш чыл бурунгаар Президент Владимир Путинниӊ саналы-биле эгелээн.
Уругларныӊ күзелин амыдыралга херек кырында боттандырар бүгү-российжи акцияга чурттуӊ харыысалгалыг ажылдакчылары, эрге-чагырганыӊ төлээлери чылдыӊ-на киржип турар.
«Баштайгыларныӊ шимчээшкини» бо чылын «Күзелдер шивизин» республиканыӊ Чазак бажыӊында шимеп каастаан.
ТР-ниӊ Шериг комиссары Демир-оол Артына кызыгаар чоогунда Кызыл-Хая суурда Отсурен Салчактыӊ күзелин боттандырар болган. Он беш харлыг оол акустиктиг гитаралыг болуксаарын бижээн болган.
Демир-оол Иванович акустиктиг гитарага «Идегелиӊ, бүзүрелиӊ күштүг болзун!» деп чылыг сөстүг йөрээлди бижээш, холунуӊ үжүүн салган. Чаа чыл белээн ол боду Мөӊгүн-Тайга кожуунга сургакчылап чорааш, чедирип бээр.
Ачы-буянныг үүле бүдүрер күзелдиг улус бо акцияга киржип болур. 2018 чылдан тура бо беш чыл дургузунда уругларныӊ 107 муӊ күзелин боттандырган. «Күзелдер шивизи» акция 2024 чылдыӊ февраль 28-ке чедир уламчылаар.
Р. ДЕМЧИК
«Шын» №100 2023 чылдың декабрь 30
