"Усма" көдээ ажыл-агый бүдүрүлгези картошка тарыыр шөлүн чардырып эгелей берген. Бо чылын ногаа аймаан база картошканы 65 гектар шөлге тарыыр сорулганы салган. Чер чардырар болгаш үлдүрертип чымчадыр ажылда 4 трактор хаара туттунган. Ында бүдүрүлгениң кежигүннери Ахмед Дадар-оол, Мөңгүн-оол Данзы-Белек, Владимир Домбаа, Эрес Санчыт тракторлары-биле ажылдап турарлар. Оларга Эйлиг-Хемниң аңгор өшкүлер өстүрүп турар фермери, чоокта чаа грант алгаш, чаа тракторну 4-5 хонук бурунгаар алган Түмен Шагдыр дузалажып турар. Черниң шыгы өйүнде, суггарылга системазы база чанында. Суггат бугазы чорудар черни база баш бурунгаар чара тыртып алганнар.
Каш хонук агаар-бойдус чылып кээрге, тайганың хары эрип, Торгалыг суу көдүрлүп келген. Мөңгүн-оол Данзы-Белек сугнуң бедиин, суггарылга бугазынче чоруткан каналды доктаамал хынап турар.
Улуг-Хем кожууннуң чагырга даргазы Б.М. Балбак кожууннуң тараа, ногаа шөлдерин кезип, араттарның ажылдап турарын хынап чорааш, "Усма" көдээ ажыл-агыйга кожууннуң тракторун чер чардырар үеде ажыглаар кылдыр чөпшээрээн.
Бо көдээ ажыл-агый эрткен чылдарда хамчыктыг аарыг коронавирустан чонну эмнеп, изоляцияга турган эмчилерге күзүн боттары ажаап алыр кылдыр картошканы тарып берип, чайладыр чашпанын аштап, хораннап, довураан чымчадып берип турган түңнелинде, эмчилер чаагай дүжүттү ажаап ап турганнар. Орулгазы эвээш, амыдыралының байдалы чегей өг-бүлелерге дуза кылдыр база чылдың-на тарып берип турар.
Амгы үеде "социал картофель" деп губернатор төлевилели-биле кожууннуң сумуларында өг-бүлелерге картошка үрезинин үлеп турар. Оон ыңай Бай-Тайга, Чаа-Хөл, Өвүр кожууннарны база картошка үрезини-биле хандырар кылдыр дугурушкан.
"Улуг-Хем" солунундан алган.
