2024 чылдың сентябрь 16-дан тура ие капиталының сертификаттарында 10 муңдан эвээш акшалар арткан ѳг-бүлелер ону чаңгыс катап алыр тѳлевир хевиринге ап болур апарган. Бо хүнге чедир Россияның Социал фондузунуң Тывада салбыры билдириишкин киирген 946 ѳг-бүлеге 3 сая ажыг рубль түңге тѳлевирни чоруткан.
Бо тѳлевирни алырда, Күрүне ачы-дузазынга билдириишкинни киирер азы душкан-на Социал фонд салбырынга болгаш хѳй хүлээлгелиг тѳптерге киирип болур. Киирген билдириишкинни 10 хонук дургузунда кѳѳр, а агар саннарже шилчидерин 5 хонук дургузунда чорудары кѳрдүнген. Ол акшаны канчаар чарыгдаарын ѳг-бүле боду билир.
Ие капиталында ажыглаттынмайн артып калган акшаны уругнуң каш харлыындан, ѳг-бүлениң социал байдалындан хамаарылга чокка тѳлээр. Каш акша артып калганын сертификат ээлери Күрүне ачы-дузазында хуу кабинединден, чоок-кавыда Социал фонд салбыры азы хѳй хүлээлгелиг тѳптен билип ап болур.
2024 чылда ие капиталы бир дугаар уругга 630,4 муң рубль деп сагындыраал. Ѳг-бүлеге 2 дугаар уруг тѳрүттүнүп келирге, 202,6 муң рубльди немей санаар. Бир эвес 2 дугаар азы ооң соонда уруг тѳрүттүнеринге чедир ие капиталын ажыглаваан азы шуут кылдырбаан турган болза, ол ѳг-бүле 833 муң рубльди алыр эргелиг.
Ие капиталын чурттап орар байдалын экижидип алырынче, 3 харга чедир уругга ай санының тѳлевири кылдыр, уруг-дарыын ѳѳредиринге, харык-шинээ кызыгаарлыг уругнуң социал адаптациязынче азы сертификат ээзиниң пенсиязының чыылдалыг кезээнче шилчидип ап болур. Бо аргаларның чаңгызын шилип ап болур азы 2–3 чара ажыглап болур.
Ие капиталында артып калган акшаны уштуп алырының талазы-биле айтырыгларны регионалдыг контакт-тѳптүң 8-800-200-0543 дугаарынче ажыл хүннеринде 9.00 шактан 18.00 шакка чедир долгааш, ылавылап ап болур.
Россияның социал фондузунуң Тывада салбырының медээзинден.
“Шын” №76 2024 чылдың октябрь 5