“Чурагайлыг экономика” АКэО Тываның Чазаа болгаш республиканың Чурагайлыг хөгжүлде яамызы-биле кады “Чурагайлыг экономика” национал төлевилелдиң аайы-биле 2022 чылдың июнь 9-та Туризм бажыңынга “Тыва Республиканың тудуг адырынга чурагайлыг хөгжүлде” деп бир дугаар стратегия сессиязын организастап эрттирер. Ук хемчег тудуг адырынга чурагайлыг технологияларны ажыглаарының айтырыгларынга тураскааттынган болур. Стратегия сессиязының киржикчилери федералдыг болгаш регион деңнелдиг айтырыгларны сайгарып, өске субъектилерниң эң-не эки дээн арга-дуржулгазын өөренип көөр. Чижээ, тудуг адыры канчалдыр өскерлип турарыл база бо чоокку чылдарда бисти чүү манап турарыл, чүге төлевилелдерни чурагайлыг кылдыр тургузарыл дээн чергелиг айтырыгларны ук хемчег үезинде чугаалажыр.
Аңаа онзагай дээн эксперттер киржир, оларның аразында федералдыг Тудуг болгаш ЧКА сайыды Константин Михайлик, Красноярск крайның тудуг сайыдының оралакчызы Елена Звонарева, «Один к Одному» КХН-ниң генералдыг директору Алексей Горулёв, “Чурагайлыг экономика” АКэО-нуң регионнар политиказының талазы-биле директору Сергей Черемисин, РФ-тиң Тудуг болгаш ЧКА яамызының чурагайлыг хөгжүлде департаментизиниң директору Николай Парфентьев дээш оон-даа өскелер. Оон аңгыда республиканың яамыларының удуртукчулары база өске-даа сонуургалдыг албан-организация черлериниң төлээлери киржир.
Ук онзагай хемчегниң түңнелдери-биле регионга ажыглап болгу дег чурагайлыг технологияларны ажыглаар талазы-биле эгелээшкиннерни тодаргайлаар.
И. Санчат
Чурукту интернет четкизинден алган.