2025 чылдың баштайгы ийи айында Тываның оруктарынга транспортту эзирик башкарып чораан 306 чолаачы туттурган, 58 орук-транспорт озал-ондаа болганын, ооң түңнелинде 8 кижи амы-тынындан чарылганын, а 68 кижи янзы-бүрү кемдээшкинге таварышканын регионнуң парлалга конференциязының үезинде регионнуң Күравтоинспекция эргелелиниң начальниги Дмитрий Кузнецов дыңнаткан.
Орук-транспорт озал-ондактары кол нууруузу орай кежээ, дүне болуп турар. 46 озал-ондак бүрүткеттинген, оларның түңнелинде 6 кижи чок болган, 56 кижи кемдээн. Эзирик чолаачыларның буруузу-биле 8 орук озал-ондаа болган, аңаа 3 кижи амы-тынындан чарылган болгаш 7 кижи балыгланган деп Дмитрий Кузнецов демдеглээн.
Орук озал-ондааның сайгарылгазының түңнелинде мөчээн азы кемдээн чолаачылар база пассажирлер айыыл чок чоруктуң курлары-биле багланып албааны азы уруглар камгалалының сандайлары чок болганы илерээн. 2025 чылдың 2 айында 16 хар чедир назылыг уругларның киржилгези-биле 8 озал-ондак болган, аңаа 8 назы четпээннер кемдээннер.
Орук озал-ондааның база бир чылдагааны — орукту таарымча чок черлеп чадаг кижилерниң кежип турары. Ындыг чурум үрекчилери-биле Күравтоинспекция ажылдакчылары ажылды шыңгыыраткан. Оон аңгыда, эзирик чадаг кижилер база орук шимчээшкинин үреп турар. Чадаг кижилерниң буруузу-биле 13 орук озал-ондаа болган, аңаа 2 кижи амы-тынындан чарылган. Оларның дөртү эзирик чадаг кижилер болган.
Күрүне автоинспекциязының ажылдакчылары орук шимчээшкининиң дүрүмнерин сагыыры чугула деп чурттакчы чонга дыңнадыр талазы-биле идепкейлиг ажылды уламчылап турарын, чадаг кижилер орукка хепте чырыткыланып турар кезектерни ажыглаары чугула дээрзин сагындырган.
Орук шимчээшкининиң чурумунуң 32 муң ажыг хажыдыышкыннарын илереткен, ооң иштинде автоматтыг фото-видеофиксация комплекстериниң көргүскени-биле автомашиналар ээлеринге хамаарыштыр 23 муң ажыг торгаал доктаалдарны үндүрген.
Интернет дамчыштыр чолаачының шынзылгазын садып алыр чоруктар-биле демисел улам күштелирин демдеглеп, автошколаларга өөренип, мергежилин бедидип, автотранспортту оруктарга айыыл чок башкарарынче хамаатыларны парлалга конференциязының төнчүзүнде Д. Кузнецов кыйгырган.
Бистиң корр.
«Шын» №12 2025 чылдың апрель 3
