Фермер Геннадий Ким Кара-Хаак сумуда 1996 чылдан бээр картофель болгаш ногаа аймаа тарып өстүрүп келген. Бодунуң ажыл-чорудулгазынга фермер амгы үениң мурнакчы технологияларын элээн калбаа-биле ажыглап турар. Ооң ажыл-агыйында ногаа тарып олуртур болгаш ажаап алыр, суггарар ажылдар колдуунда механизастаттынган. Ынчангаш фермерниң ажыл-агыйында ажылдакчыларның саны хөй эвес. Беш кижи доктаамал ажылдап турар. Часкы, чайгы, күскү сезоннуг ажылдар үезинде херек ажылчыннарны керээ ёзугаар ажылдарга түр када хаара туда бээр. Фермерниң ажыл-агыйында ажылдап турарларның хөй кезии Кара-Хаак суурнуң чурттакчылары. Оларның аразында арга-дуржулгалыг ногаажылар бар.
Картофель болгаш ногаа аймаан дамдыладып суггарарының системазын шөлдерге тургузарының грант мөөрейинге фермер киришкеш, субсидия акшазын республиканың Көдээ ажыл-агый яамызындан алган. Грантының негелделери ёзугаар дамдыладып суггарар системаны шөлдерге тургузарынга чарыгдалдарның 75 хуузун фермер субсидия акшазы-биле, а 15 хуузун бодунуң акша-хөреңгизи-биле дуглаан. 50 метр ханы чер адаандан сугну сордуруп, ногаа аймаан дамдыладып суггарар дериг-херексел электри энергиязын эвээш чарыгдаар, сугну база суггарылгага эвээшти чарыгдаар.
Эрткен чазын Геннадий Кимниң ажыл-агыйы 20 гектар шөлге картофельди, 12,5 гектарга ногаа аймаан олурткан. Дамдыладып суггарар дериг-херекселди суггатка ажыглаанындан бо чылда картофель, ногаа аймааның дүжүдү багай эвес болган. Бо хүннерде дүжүт ажаалдазы колдуунда доозулган, картофельди болгаш ногааны кыжын чидириг чокка кадагалаарынга белеткеп турар.
Фермер Геннадий Кимниң ажыл-агыйының тарып өстүрген картофелин болгаш ногаазын колдуунда Кызыл хоорайның эмнелгелери, уруглар садтары, школалары дээш өске-даа социал албан черлери ажыглап келген. Оларның талазындан фермерниң продукциязының шынарынга хамаарыштыр хомудалдар чок.
Республикада шупту хевирлерниң ажыл-агыйларында картофель дүжүдүнүң ажаалдазы доозулган. Баш бурунгаар санаашкыннар-биле алырга, бо күзүн ажаап алдынган картофельдиң ниити өртээ 1 млрд рубль хире.
Ш.МОНГУШ.
Чурукту интернет четкизинден алган.
“Шын” №76 2024 чылдың октябрь 5
