Инвалид хамаатыларга, инвалид уруглуг ада-иеге ОСАГО полизи дээш санашкан акшазыныӊ орнун күрүне төлеп бээр.
2024 чылдыӊ эгезинден тура республиканыӊ 40 чурттакчызынга компенсацияны берген.
ОСАГО – автомобильдиг хамаатыларга харыысалганы хүлээндирип турар албан камгаладылгазыныӊ полизи. Хуу транспорттуг инвалид хамааты азы ооӊ хоойлу ёзугаар төлээзи ОСАГО керээзин чарып алган болза, оларга страховканы долузу-биле төлеп бээр.
– Хандырылга чедирип турар шупту организациялар херек медээлерни федералдыг информация баазазынче, ооӊ иштинде инвалидтерниӊ федералдыг реестринче чорудуп, ол медээни кииртип каан болза, компенсация дораан шилчип кээр – деп, Россияныӊ Социал фондузунуӊ Тывада салбырыныӊ удуртукчузу Часкал Дараа сагындырып чугаалаан.
Компенсацияны билдириишкин бижээш, база ап болур. Аӊаа кожар херек документилери: ОСАГО керээзи, инвалид деп бижээн эмчи экспертизазыныӊ шынзылгазы, реабилитация болгаш транспорт садып ап болур деп эмчиниӊ бадыткалын бижээн документизи (ИПРА).
Оларны Күрүне ачы-дуза порталын, хөй ажыл-чорудулгалыг төптер (МФЦ) таварыштыр чорудуп болур. Бир эвес боттары чедирип бээр дээр болза, Социал фондунуӊ клиентилер-биле ажылдаар албанынга баар.
Компенсация бээрин 5 ажыл хүнүнүӊ дургузунда шиитпирлээш, оон 5 хүн дургузунда акшаны шилчидип бээр.
ОСАГО полизинде айтып каан хуусаада билдириишкин киирер дээрзин утпаза чогуур.
Р. ДЕМЧИК очулдурган.
“Шын” №96 2024 чылдың декабрь 14