РФ-тиӊ Чазааныӊ доктаалы ёзугаар Россия Федерациязыныӊ истелге органнарыныӊ ажылдакчызыныӊ хүнүн чылдыӊ-на июль 25-те демдеглеп турар.
Тываныӊ Баштыӊы Владислав Ховалыг РФ-тиӊ Истелге комитединиӊ Тыва Республикада Истелге эргелелиниӊ коллективинге болгаш ооӊ удуртукчузу Константин Столбинге байыр чедирген.
Республиканыӊ истелге ажылдакчыларыныӊ эки көргүзүглүг ажылы, кем-херектериниӊ хөй хуузун ажыдып истээни, эрге-хоойлу хажыдар чоруктарныӊ саныныӊ эвээжээни, үүлгедиглерин болдурбазыныӊ талазы-биле ведомстволар аразында ажылдарга идепкейлиг киржилгези, арагалаашкынга удур демисежип, Тывада назы четпээн уругларныӊ эрге-хоойлу хажыдар чоруктарын баш удур болдурбайн, уругларныӊ эрге-ажыын камгалап турары дээш регионнуӊ Баштыӊы өөрүп четтиргенин илереткен.
Тываныӊ истелге органнарыныӊ ажылдакчылары Ада-чуртун камгалаар хүлээлгезин амгы үеде тускай шериг операциязыныӊ девискээринде эрес-дидими-биле күүседип, Россияныӊ чаа регионнарыныӊ хостаттынган черлеринде нарын байдалда ажылдап турар дээрзин Владислав Ховалыг демдеглээн.
«Бистиӊ чуртувуста хоойлу-дүрүмнүг чорукту, хамаатыларныӊ эргелерин, күрүнениӊ эрге-ажыын камгалап турар силер. Бедик профессионал билиглерлиг, шынчы, эп-чөптүг болгаш ужур-дүрүмнуг болурун силерниӊ ажылыӊар негеп турар. Амгы үеде Россияныӊ истелге органнары кем-херек үүлгедиишкиннери, коррупция, экстремизм-биле демисежир нарын даалгаларны шиитпирлеп, хоойлу-дүрүмнүг болгаш чөптүг чоруктуӊ тергиидээрин чедип ап турар. Дыка хөй чүүлдерде бистиӊ чуртувустуӊ социал-экономиктиг сайзыралыныӊ чедиишкинниг болурун хандырып турар» — деп, Тываныӊ Баштыӊы чугаалаан.
Владислав Ховалыг истелгениӊ хоочуннарынга өөрүп четтиргенин онза сөстер-биле илереткен. Ада-чуртунга бараан болуп хөй чылдар иштинде бодун хайыралавайн ажылдап чорааны, ажыл-хүлээлге болгаш ат-алдар дээрге оларга анаа сөстер эвес, а бүгү амыдыралыныӊ ажыл-херээ болуп келгени онза үлегер дээрзин айыткан. Истелге адырыныӊ шупту төлээлериниӊ ажыл-албаны чедиишкинниг болурун күзээн.
ТР-ниӊ Чазааныӊ медээлеринден Р.Демчик белеткээн.