Эрзин кожуунда теве кыргылдазы эгелээн
Теве кыргылдазы – хөй күш, мергежил негеттинер ажыл. Ам артында тевениң деңзизи аар болгаш аажы-чаңы бардам, шолук болур. Оларны чыттыр идип алгаш кыргыыр. Бир улуг тевени тудуп ап, чыттыр идип алыр дизе, эвээш-ле дизе алды дуржулгалыг ажылчын херек. Ортумаа-биле чаңгыс теведен 7 килограмм чедир дүктү алыр. Бо чурукта «Бай-Хөл» көдээ ажыл-агый бүдүрүлге кооперативиниң тевелерин көргүскен.
Часкы хову ажылдары хайныккан
Бо хүннерде республикаже 438 тонна үрезинни киир сөөрткен. Оларның иштинде: Улуг-Хем кожуунче — 80 тонна, планда көрдүнген хемчээлдиң 61,4 хуузу; Чеди-Хөл кожуунче — 20,7 тонна, планда көрдүнген хемчээлдиң 17 хуузу; Чөөн-Хемчик кожуунче — 162 тонна, планда көрдүнген хемчээлдиң 80,7 хуузу; Бии-Хем кожуунче 165,5 тонна үрезинни чедирген, планда көрдүнген хемчээлдиң 38,6 хуузу; Сүт-Хөл кожуунче 10 тонна үрезинни чедирген, планда көрдүнген хемчээлдиң 3,4 хуузу.
Май айда республиканың агроүлетпүр комплекизи хайныышкынныг ажыл-иште. Көдээ суурларда база оларның чоок-кавы черлеринде часкы хову ажылдары хайныккан.
Шилилгениң тиилекчилерин илереткен
Малчын коданнарны суг-биле хандырганы, 2024 чылда оларны электри шугумунга азы электри энергиязының өске-даа үндезиннеринге кожары-биле холбашкан чарыгдалдарның (шүүделдиң) кезик-чамдыызын дуглаарынга көрдүнген субсидияларны тыпсырының шилилгезиниң түңнелдерин үндүрген.
Тыва Республиканың Чазааның 2023 чылдың ноябрь 15-теги 836 дугаар доктаалы-биле бадылаан болгаш “Көдээ ажыл-агыйның хөгжүлдези болгаш Тыва Республикага көдээ ажыл-агый продукциязының, чиг-эттиң база аъш-чем рыногунуң аайлаштырылгазы» Күрүне программазынга дүүштүр, а ол ышкаш «Электроннуг бюджет» деп күрүнениң информастыг системазының протоколунга үндезилеп, субсидия алырынга түңнелдерни үндүрүп, шилилгениң тиилекчилерин тодараткан.
Шилилгениң тиилекчилериниң даңзызы:
- Орлан Сарбааевич Куулар (Чөөн-Хемчик кожуун);
- Аянмаа Юрьевна Эренчин (Тес-Хем кожуун);
- Михаил Юрьевич Ондар (Кызыл кожуун);
- Угулза Сарайевна Монгуш (Кызыл кожуун);
- Аяс Александрович Монгуш (Кызыл кожуун);
- Сылдыс Валериевич Ондар (Кызыл кожуун);
- «Сайзырал» көдээ ажыл-агый бүдүрүлге кооперативи (Мөңгүн-Тайга кожуун);
- Шолбан-оол Коңгар-оолович Монгуш (Таңды кожуун);
- Алла Константиновна Куулар (Чөөн-Хемчик кожуун).
Көдээ ажыл-агый яамызының медээлеринден А. ХЕРТЕК белеткээн
Чуруктарны интернет четкизинден алган.
“Шын” №36 2024 чылдың май 18
