Көдээ туризм сайзыралынче грантыны ап болур

«Агротуризм» грантызын бээринге мөөрей шилилдезинге киржир билдириишкиннер хүлээп алыышкыны Тывада эгелээнин, республиканың Көдээ ажыл-агый болгаш аъш-чем яамызы дыңнаткан. Грантының хемчээли 3-тен 10 млн рубль хире. Көдээ туризмни хөгжүдер төлевилелдерни боттандырарда, дараазында тускай сорулгалыг угланыышкыннарже акша-хөреңгини бээр:

1) көдээ туризм адырында ачы-дуза көргүзер ажыл-чорудулганы чорударынга ажыглаар черлер, турисчи көргүзүг объектилери, көдээ туризмниң хөглээшкинниг инфраструктура объектилерин садып, тудуп, эде кылып база эде чаартып турарынга;

2) оларны чырык, суг, газ база чылыг дамчыдар, канализация четкилеринге кожары, автономнуг чырык, суг, газ база чылыг хандырылгазын чаагайжыдары;

3) көдээ туризм адырында ачы-дуза көргүзер ажыл-чорудулгага ажыглаар черлерни дерииринге турисчи дериг-херекселдерни, дериглерни база эт-херекселдерни, техниканы, тускайжыттынган транспортту база дериг-херекселдерни садып база эптээринче;

4) объектиниң чоок-кавы девискээрин чаагайжыдар ажылдар кылырынга: дыштанылга зоназын, спортчу болгаш уруглар ойнаар шөлдер, кадыкшылы кызыгаарлыг кижилерге бөдүүнчүткен күш-культура болгаш спорт кичээлдерин эрттирер шөлдер тудуп база чаагайжыдарынга; девискээрлерни, кижилер кылаштаар черлерниң чырыдылгазын организастаарынга, машина тургузар черлерни кылып, чаагайжыдарынга, херимнер кылырынга, инвалидтерниң болгаш чурттакчы чоннуң шимчеп албас өске-даа бөлүүнүң шаптараазын чок шимчээшкинин хандырар сорулга-биле девискээрлер чаагайжыдарынга, бойдус ландшафтарын болгаш төөгү-культура тураскаалдарын камгалап база катап тургузарынче.

Суурда азы көдээде 5 чылдан эвээш үе дургузунда ажылдап турар, көдээ ажыл-агый продукциязының бүдүрүкчүлери кылдыр бүрүткеткен (хууда дузалал ажыл-агыйының ээлери кирбес) кижилер грантыже кордап болур. ТР-ниң Көдээ ажыл-агый яамызының албан езузунуң сайтызында бо шөлүгден https://mcx.rtyva.ru/events/23426/ кордакчылар кандыг негелделерни албан кылырын билип ап болур.

Тыва Республиканың фермер бизнезин база көдээ ажыл-агый кооперативтерин хөгжүдүп сайзырадыр фонд кордакчылардан билдириишкиннерни апрельдиң 24-тен май 20-ге чедир хүлээр. Грант дугайында тодаргай тайылбырны база сонуургап турарыңар айтырыгларга харыыларны бо телефондан 8(394-22) 2-62-22 азы электроннуг почта адрезинден: fond17msx@mail.ru билип ап болур.

/ ТР-ниң Чазааның парлалга албаны.
Чуруктарны интернет четкизинден алган.

"Шын" №30 2023 чылдың апрель 26