Көдээде амыдырал туруп кан деп болур. Бо шагда печкага паштаныр кижилер ховар. Ток күжү-биле амыдырап турар бис. Хеп чуур машина, соодукчу, телевизор үрелирге, кылыр мастерлер чок, Кызылга кылдыртыр. Ында безин тыва мастерлер ховар. Суурга чүге ындыг мастерлерни өөредип албас бис? Кайда өөредип турарыл?
Ол айтырыгны дарый шиитпирлеп, күзелдиг оолдарны өөредип алырын күзээр кижи-дир мен. Кижи бүрүзү чүък сөөртүр машиналыг эвес. Оода кожуун төвүнге техника кылыр мастер болза. Шагаан-Арыг чеже-даа хоорай болза, ол талазы-биле сайзырал чок. Көдээ черлерде чурттакчыларның дилээ мындыг-ла-дыр. Бистиң дилээвиске кичээнгей салырынга бүзүреп артывыс.
Бок
Бо чылдың май 22-де “Шын” солунга “Бокту кайнаар төгерил?” деп кончуг нарын айтырыгны чырыдып, чонга таныштырып үндүргени кончуг эки болду. Коммунистиг партия үезинде ышкаш эвес, ам бо демократия дээр капиталистиг удуртулганы чон эки биликсевес, азырадыкчы хөөнге өөрени берген болгаш, бо үеде организациялар боттары акша-көпеек ажылдап алыр апарганда, кайы, кандыг негелде-биле ажылдап-чурттап турарывысты сагыыр болза эки, чонум. Нарын айтырыгның бирээзи — бок. Каът бажыңнар, черде бажыңнар дээш негелде өскен. Черде бажыңда улус бок дээш төлээр болза эки, бензинче хөй чарыгдал үнер, бок төгерде, кывар-чаар материал садар акша херек болгай.
Бо чүүлде бир нарын айтырыг – шилдер, бузунду шилдер, арага шилдерин кайнаар төгерил? Мал-маган шил айыылдыг деп чүвени билир эвес. Оон аңгыда, шил чер кырынга каш-даа чыл чыдар, ол эзилбес, век-веги-биле чыдар. 1,5–2,0 метр ханы оңгар каскаш, аңаа шыгжаза кандыгыл? Бир шиитпирлеттинмээн айтырыг ол-ла-дыр. Азы шилди хүлээп турар завод болза улам эки.
Мария ТЮЛЮШ.
Шагаан-Арыг хоорай.
"Шын" №53 2024 чылдың июль 17