Күрүнеден социал деткимче алырының дугайында билдириишкиннерни хамаатылар интернетте электроннуг хевирге чорудуп болур арга бар-даа болза, назы-хар, аарыг-аржык дээш өске-даа чылдагааннар уржуунда ону ажыглап шыдавас, оларга албан-биле чедип, тайылбырлаар, документилерни четчелээринге болгаш бижииринге дузалаар байдалдар тыптып кээр.
Россияның социал фондузунуң Тыва Республика талазы-биле салбырының шимчеп чоруур клиент албанының ажылдакчылары көдээ суурларже үнүп, күрүне деткимчезиниң янзы-бүрү хевирлерин алырынга документилерни тургузар талазы-биле тайылбыр ажылын чоннуң аразынга чорудуп эгелээн. Пенсияже үнериниң болгаш пенсия акшазын алырынга, чиигелделер болгаш социал төлевирлер документилеринге, ие капиталын ажыглаарынга хамаарыштыр тайылбырларны кылып, документилерни канчаар долдурарынга болгаш билдириишкиннерни бижииринге дузаны көргүзүп турарлар.
Шимчеп чоруур клиент албанының ажылдакчылары эң-не баштай март 13-те Сукпак суурда хоочуннарның болгаш инвалидтерниң бажың-интернадынга четкеннер.
Март 20-де Улуг-Хем кожууннуң Торгалыг, Чодураа суурларга, март 26-да Бии-Хем кожууннуң Аржаан суурга чедер сорулгалыг.
Апрель айда Россияның социал фондузунуң Тыва Республика талазы-биле салбырының шимчеп чоруур клиент албанының ажылдакчылары Таңды, Чаа-Хөл, Өвүр кожууннарның суурларының чурттакчыларынга тайылбыр болгаш дуза ажылын чорудуп баар.
Дуза херек апарган айтырыгларга хамаарыштыр харыыларны Россияның социал фондузунуң Тыва Республика талазы-биле салбырының изиг шугумунуң 8-800-100-00-01 дугаарлыг телефону дамчыштыр ажыл хүннеринде 09.00 шактан 18.00 шакка чедир билип ап болур.
Виктория САЛЧАК, Россияның социал фондузунуң Тыва Республика талазы-биле салбырының МИЧ-лер болгаш хөй-ниити-биле кады ажылдажылга талазы-биле башкарыкчы специалист-эксперти.
Чурукту интернеттен алган.
“Шын” №10 2025 чылдың март 20