«Өскүс-оол. Сырын хаттың тоожузу» («Өскүс-оол. Легенды ветров») тыва мюзиклдиң баштайгы көргүзүү 2024 чылдың декабрь 21-де В.Көк-оол аттыг Национал хөгжүм-шии театрынга болуру манаттынып турар.
Бо хүннерде кол кичээнгей ол төлевилелдиң либреттозунуң тургузукчузу РФ-тиң өөредилге адырының Хүндүлүг хамаатызы, билдингир башкы Вилория Чаповна Шожукпанче угланганы ужурлуг.
Вилория Шожукпан – орус дыл болгаш литература башкызы болурундан аңгыда, шүлүк бижиир, аялга чогаадыры-биле чонда билдингир апарган. Ол “Даңгына Ай-кыс” тоолчургу чугааны бижээн. “Тандем” чогаадыкчы эвилелдиң тургузукчузу болуп турар. “Өскүс-оол” мюзиклдиң либреттозун тургузарынга аңаа Күжүгет Шойгу аттыг Культура фондузунуң грант деткимчези дузалыг болган.
“Амгы үеде бодунуң ада-өгбезиниң үндезин дөзүнүң быжыын ханы билир, улуг кижиниң амыдырал оруунче базып кирип тура, бодунга бүзүрелдиг, дидим аныяк оолдуң овур-хевири чугула херек”– деп, тыва улустуң Өскүс-оол дугайында тоолунга үндезилээн мюзиклде көргүзүп турар теманың чугулазын Вилория Чаповна ынчаар демдеглээн.
Бистиң корр.
ТР-ниң Культура яамызының медээзи.
“Шын” №92 2024 чылдың ноябрь 30
