Күрүнениң чаңгыс аай шылгалдазын кожууннуң доозукчулары Шагаан-Арыгның 2 дугаар школазынга эрттирер. Доозукчу 9-ку классчылар 429, 11-ги классчылар 183 кижи шылгалданы дужаар. Шылгалда дужаар өөреникчилерниң санынче эрткен чылдың доозукчулары, ИК-4-тен, кежээки школадан болгаш бажыңнарында өөренип турар инвалид уруглар база кирип турар.
Шылгалданы эрттирер негелделер аайы-биле ажылдар кылдынган. Өөреникчилерниң айыыл чок чоруун кичээнгейге алыр, оларны аай-дедир школа машиназы-биле чедирер, эмчи хайгааралын тургускан, полиция нарядының дежурныйлаашкынын организастаан. Шылгалда пунктузун үзүктел чок чырык-биле хандырары айыттынган, бир эвес кандыг-бир чылдагаан-биле электри өже бээр болза, энергияның өске дөзүнче кожуптар арганы баш бурунгаар белеткээн.
Хем ол чарыында Эйлиг-Хем ортумак школазының доозукчуларының аай-дедир аргыжылгазын онза кичээнгейде алган. Паром кежии-биле кежер, аай-дедир аргыштырар автобус бар. Бир эвес суг улгадып эгелээр байдал тургустунуп келир апарза, доозукчуларны баш бурунгаар Шагаан-Арыг хоорайга чурттадып, №1 школага шылгалдага белеткелин организастаар.
Россияның Чырыдыышкын яамызы 2023 чылдың чаңгыс аай күрүне шылгалдазының чурумун доктааткан. Школачыларга Чаңгыс аай күрүне шылгалдалары адаанда чуруктарда көргүскени хүннер езугаар эртер.
Доозукчуларның эртем аайы-биле физика, химия, информатика эртемнерин эрткен чылдарга деңнээрге, хөй доозукчулар шилип турар. Школаларда компьютерлер болгаш өске-даа өөредилге, угаан сайзырадыр дериг-херекселдер-биле дериттинген “Өзүлде точкалары” деп тускай класстар эки салдарны чедирип турарын көргүзүп турар. Ол ышкаш, сайзыралдыг үеде ажыл-агыйлар-даа информас-техниктиг, чурагайжыттынган технологиялар дузазы-биле ажылдаар апарганы-биле ол эртемнер чуртталгага чугула херек апарган.
2023 чылда күрүне шылгалдаларын организастап эрттиреринче тус чер бюджединден 1 501 250 акшаны тускайлаан.
Улуг-Хем кожууннуң медээзи-биле.
КҮРҮНЕ ШЫЛГАЛДАЛАРЫ
28 мая 2023
23