Чаа чыл бүдүүзүнде, декабрь 28-те, В.Көк-оол аттыг национал хөгжүм-шии театрынга республиканың аңгы-аңгы адырларында шылгараңгай ажылдап чоруур хамаатыларга күрүне шаңналдарын тывыскан.
Аңаа ТР-ниң Баштыңы Владислав Ховалыг болгаш ТР-ниң Чазааның Даргазының оралакчылары, яамыларның сайыттары болгаш регионнуң ырак-чоок кожууннарындан келген аалчылар киришкен.
РФ-тиң Президентизи Владимир Путинниң чарлыы-биле, ажы-төлүн төлептиг кижизиткени база аныяк өскенге үлегери дээш, Николай Кертик-оолович, Валентина Сандан-ооловна Монгуштарның өг-бүлезинге «Ада-иениң алдары» орденни тывыскан.
РФ-тиң тудуг сайыды Ирек Файзуллинниң дужаалы-биле, Тыва Республиканың тудуг төлевилел институдунуң кол специализи Валентина Токмань, «Тувастрой» акционерлиг ниитилелдиң чиңгине директору Маадыр-оол Кыргыс, ТР-ниң тудуг төлевилел институдунуң техниктиг килдизиниң даргазы Анатолий Оюн оларга тудуг адырынга шылгараңгай күш-ажылы дээш, «Россияның хүндүлүг тудугжузу» деп атты тывыскан.
ТР-ниң Баштыңының дужаалы-биле, Республиканың сайгарлыкчы чорук талазы-биле хөгжүлдезинге киирген үлүг-хуузу дээш база тускай шериг операциязында киржип турар дайынчыларны деткииринге идепкейлиг киржилгези дээш, ТР-ниң Баштыңының өөрүп четтириишкин бижиин «Чүък чүдүрер автомобильдер» акционерлиг ниитилелдиң чиңгине директору Дмитрий Черевкога тывыскан.
Хөй чылдарда өөредилге адырынга үре-түңнелдиг ажылы дээш, Кызылдың Президентиниң кадет училищезиниң математика, информатика башкызы Ольга Магеряга ТР-ниң Баштыңының өөрүп четтириишкин бижиин тывыскан.
Онза байдалдар адырынга бердинген күш-ажылы дээш, ТР-ниң Баштыңының өөрүп четтириишкин бижиин РФ-тиң ОБЯ-ның Тывада салбырының камгалакчызы Сайын Дугар-оолга берген.
ТР-ниң Баштыңының чарлыы-биле, эрес-дидим маадырлыг чоруу дээш, «Тускай шериг операциязының киржикчизи» атты 46108 шериг кезээниң адыгжызы Чайдаш Ооржакка тывыскан.
Орук-тудуг адырынга хөй чылдарда шылгараңгай күш-ажылы дээш, «Восток» КХН-ниң директорунуң оралакчызы Андрей Гриченкога, республиканың энергетика адырының хөгжүлдезинге киирген үлүг-хуузу дээш, «Россети Сибирь Тываэнерго» акционерлиг ниитилелдиң ажылдакчызы Елена Коротцеваны, ол-ла ниитилелдиң машинизи Сергей Городиловту ТР-ниң Баштыңының хүндүлел бижии-биле шаңнаан.
Хөй чылдарда көдээ ажыл-агый адырынга бердинген күш-ажылы дээш, көдээ ажыл-агыйның хоочуну Петр Найдан-оолга «Тыва Республиканың көдээ ажыл-агыйының алдарлыг ажылдакчызы» атты, регионнуң күш-культура болгаш спорт адырынга киирген үлүг-хуузу дээш, Тыва Республиканың чыынды командалар белеткээр төвүнүң тренери Самет Чимбиянга «Тыва Республиканың күш-культуразының болгаш спорттуң алдарлыг ажылдакчызы» атты, кадык камгалалынга хөй чылдарда үре-түңнелдиг күш-ажылы дээш, Республиканың бичии уруглар эмнелгезинң гастроэнтерологу Екатерина Иргитке «Тыва Ресупубликаның алдарлыг эмчизи» атты тывыскан.
Күш-культура болгаш спорт адырынга хөй чылдарда үре-түңнелдиг күш-ажылы дээш, Танды кожууннуң спорт школазының директору Михаил Оюнга «Тыва Республиканың мурнунга ачы-хавыяазы дээш» деп Тыва Республиканың медалын тывыскан.
Хөй чылдарда республиканың энергетика адырынга үре-түңнелдиг күш-ажылы дээш, Ак-Довурак хоорайның «Башкарылга компаниязы ТЭК4» участогунуң даргазы Александр Дубковту «Тыва Республиканың мурнунга ачы-хавыяазы дээш» деп Тыва Республиканың медалы-биле шаңнаан.
Регионнуң социал адырының хөгжүлдезинге киирген үлүг-хуузу дээш, күш-ажылдың хоочуну Николай Сарыгларга «Шылгараңгай күш-ажылы дээш» деп Тыва Республиканың медалын тывыскан.
Айдың ОНДАР.
Буян ООРЖАКТЫҢ тырттырган чуруктары.
