Май 21-де Күрүнениң түңнел аттестациязының кол чадазын 9 болгаш 11 классчылар эрткен. Тывага ниитизи-биле шылгалдаларны 9,5 муң доозукчу дужаар. Тоску классчыларның бирги шылгалдазы – даштыкы дыл, ону май 21–22 хүннеринде дужаар.
Ол ышкаш май 21-де тоску классчылар төрээн дылга, он бирги классчылар төрээн чогаалда шылгалданы дужааган. А май 23-тен тура 11-ги классчылар география, литература, химияга шылгалдаларны эртер.
Доозукчуларның хөй кезии информатика, ниити билиг, география, биология, химия эртемнерин шилип алганын сагындыраал. Бо эртемнерни 9071 доозукчу шилээн.
«Эрткен чылдарга деңнээрге, тоску классчыларның аразындан физика эртемин шилип алганнар хөй. Оон аңгыда, ниити билиг, география, химия, англи дыл эртемнерин шилип турар. 11-ги классчылар ортузунда ниити билиг, математика (профильдиг), биология, химия эртемнери чугула болуп артпышаан.
А төөгү, физика, англи дыл,география болгаш информатиканы шилээн доозукчуларның саны эрткен чылдың деңнелинде хевээр» — деп, Тываның өөредилге сайыды Елена Хардикова демдеглээн.
ТР-ниң Өөредилге яамызының медээлеринден.
«Шын» №37 2024 чылдың май 22