2020 чылдан тура Тываның 65 муң ажыг чурттакчызы электроннуг күш-ажыл дептериниң ажыктыын көргеш, саазын хевирден ойталаан. Ук шилилге чурагайлыг технологиялар үезинде канчаар-даа аажок эки деп бадыткаттынган: ажылдаан черлериниң дугайында медээлер долузу-биле кадагалаттынып артар болгаш ырактан ажылга тургустунарынга эки талалары база бар.
Электроннуг күш-ажыл дептеринде саазын хевирде ышкаш ол-ла медээлер бар болур: ажылдакчының бодунуң, ажылче хүлээп болгаш халашкан хүннери, бир ажылдан өскезинче шилчээни, күш-ажыл керээзин соксаткан азы катап тургускан дугайында болгаш оон-даа өске.
Ынчалза-даа электроннуг күш-ажыл дептериниң айыыл чок байдалы бедик деңнелде, медээлер эки кадагалаттынып турар, бодунуң күш-ажыл чорудулгазының дугайында медээлерни дораан көрүптер эки талалары база бар. Күш-ажыл дептериниң чурагайжыттынган хевиринде медээлерни кандыг-даа үеде бодунуң күрүне ачы-дуза порталында хууда кабинединден хайгаарап болур. Ында медээни үреп азы чидирип-даа болбас, частырыгны чииги-биле эдиптер. Оон аңгыда пенсия кылдырары бөдүүн, ооң дузазы-биле ырактан ажылга тургустунуп база болур.
Күрүне ачы-дуза порталындан күш-ажыл чорудулгазының дугайында ушта бижидилгени кандыг-даа үеде чагыдып ап болур. Дилээшкин кылыр черге “Электронная трудовая” деп бижиптерге чедер.
Күш-ажыл дептеринге хамаарышкан айтырыглар бар болза, Россияның социал фондузунуң Тыва Республикада салбырының специалистеринче дараазында чаңгыс аай контакт-төп таварыштыр долгап болур:
8-800-100-0001.
Тывада социал фонд салбырының медээлеринден.
“Шын” № 23 2025 чылдың июнь 19