Ноябрь 22-де Тываның күрүне университединиң күш-культура болгаш спорт факультединиң тургустунганындан бээр 25 чылдаан оюнга тураскааткан шуулган болган. Эртемденнер, башкылар база студентилерниң киржилгези-биле болган шуулганга төөгүлүг 1 дугаар спортчу музейни бедик деңнелге ажытканы кажанда уттундурбас.
ТывКУ-нуң ректору, философия эртемнериниң доктору Ольга Хомушку база Красноярскының педагогика институдунуң профессору Дмитрий Завялов шуулганны ажыдып, чыылганнарга изиг байырны чедиргеннер. Күш-культура болгаш спорт факультеди 1999 чылдың сентябрь 30-ден тура стандарттарга дүүштүр ажылдап эгелээн. Ук факультет бедик деңнелдиг өөредилгени чорудуп, хөй-хөй салым- чаяанныг спортчуларны, тренерлерни, башкыларны доостурган. Ында эртем-шинчилел ажылын амгы үеге дүүштүр чорударынга бүгү-ле эки байдалды тургускан, ол ышкаш спортту, кадык амыдыралды сайзырадыр төлевилелди чедиишкинниг боттандырар сорулгалыг дээрзин университеттиң ректору демдеглээн.
Факультеттиң деканы, педагогика эртемнериниң кандидады Чечена Алдын-ооловна Дажы шуулганның киржикчилеринге байырын чедирбишаан, факультеттиң хөгжүлдезинге үлүг-хуузун киирген башкыларны, оларның аразында бирги профессор, эртем доктору, факультеттиң бир дугаар деканы Херел-оол Дажы-Намчалович Ооржакты онзагайлап демдеглээн. Ол ышкаш факультетте 8 эртем кандидады, оларның 6-зы доцентилер, дуржулгалыг 8 башкы, 4 башкы, 1 ассистент, 7 ажылдакчы барын таныштырган.
Күш-культура факультединде 3 кафедра база эртем-шинчилел лабораториязы (удуртукчузу, доцент, педагогика эртемнериниң кандидады Елена Михайловна Аг-оол) бар. Студентилерни өөредиринге 4 спорт залы, 2 хүреш база тускай дерилгелиг 1 бокс залы, 1 ажык стадион, 1 бассейн бар.
Ол ышкаш Казак Республиканың Спорт болгаш туризм академиязы, Актюбинскиниң К. Жубанов аттыг Күрүне университеди, Республиканың спортчу командалар белеткээр төвү, спорт школалары, ниити билиг школалары, ИХЯ, айыыл чок чорук албаны, шериг кезектери, күрүнениң база кожууннарның албан черлери-биле керээни чарып, чедиишкинниг ажылдап турарын демдеглээн.
Факультеттиң адын Россияда алдаржыткан студентилер болгаш башкыларны база таныштырган: Тываның 1 дугаар спорт мастери, доцент, педагогика эртемнериниң кандидады Өргелээр Ондар, университетке спорт клувун ажыткан, спорттуң национал хевирлеринге делегей чергелиг шуулганнарның удуртукчузу, доцент, педагогика эртемнериниң кандидады Сергей Ооржак, доцент, педагогика эртемнериниң кандидады, бокс тренери, Тыва Республиканың алдарлыг ажылдакчызы Илья Шивит-Хуурак, 1 дугаар спорт музейиниң ажыдыкчылары Елена Аг-оол, Чечена Даңы, сумога делегей чергелиг шииткекчи Болат Шагжы, ушу тренери Роберт Күнзек, Олимпий оюннарының киржикчизи Лориса Ооржак, башкызы Россияның алдарлыг тренери Виктор Достай, Россияның алдарлыг спорт мастерлери Опан Сат, Начын Куулар (хостуг хүреш), Мерген Ооржак (кик-бокс) дээш оон-даа өскелер.
Бир дугаар спортчу музейниң байырлыг ажыдыышкынының соонда, ТР-ниң Дээди Хуралының мурнундан депутаттар Буян Биче-оол, Россияның Маадыры Мерген Донгак, ТР-ниң Спорт база Өөредилге яамыларындан, ТывКУ-нуң удуртулгазындан шаңнал-макталды хөй башкыларга тывыскан.
Факультеттиң чылдар аайы-биле доозукчулары база башкылары шупту тыва хептиг солун концертти Россияның алдарлыг артизи, Тываның улустуң хөөмейжизи Андрей Монгуш игил ыяңгызын ойнаан соонда, көргүскени уткалыг, солун болган.
Алексей ЧАМБАЛ-ООЛ, спорттуң хоочуну.
«Шын» №93 2024 чылдың декабрь 4
