Москвага март 5–6 хүннеринде «Россия» делгелге-чыышка Тывадан Көшкендейлерниң салым-чаяанныг өг-бүлези киржир.
Ооң бүдүүзүнде Москваже Игорь болгаш Айдысмаа Көшкендейлерниң өг-бүлези оглу Чолдуг-биле ужуп чеде берген. Олар– үндезин хөөмей-сыгыттың, улусчу ырыларның кадагалакчылары. Март 5–6-да Федерация Чөвүлелиниң ачызында болуп эртер Бүгү-россияның херээженнер чыыжынга олар киржип, «Россия» деп делгелге-чыыштың 75 дугаар павильонунга ийи хүннүң дургузунда хөөмейге мастер-класстарны эрттирер. А март 6-ның 15.30 шакта өг-бүлениң бо үш кежигүнү уран чаяалгазын чыылганнарга бараалгадыр. Ооң шала бетинде “Эдегей” идик-хеп болгаш моданың театры көргүзүүн бараалгадыр. Ол болза Мода неделязының каасталгазы болур.
Өг-бүлениң эр ээзи – Игорь Көшкендей Тыва Республиканың улустуң хөөмейжизи. Ол 1998 чылда хөөмей күүседикчилериниң «Хөөмей–1998» деп Үшкү Бүгү-делегей мөөрейиниң Гран-при шаңналының эдилекчизи. Игорь Көшкендей – «Чиргилчин» салым-чаяанныг коллективтиң удуртукчузу, ол ышкаш 2007 чылда ол Россия Федерациязының Чазааның “Чоннуң хөңнү” деп шаңналының «Чоннуң үндезин культуразы» деп номинациязының баштайгы тиилекчизи. Тыва улустуң ырыларының күүседикчизи Айдысмаа Көшкендей 2015 чылда II чергениң «Ада-чурттуң мурнунга ачы-хавыяазы дээш» орденниң медалы-биле шаңнаткан, а 2019 чылда аңаа “Тыва Республиканың алдарлыг артизи” деп, а 2021 чылда «Россия Федерациязының алдарлыг артизи» атты тывыскан. Чолдуг биле Айгорь деп оолдары бо сурагжаан чогаадыкчы өг-бүлениң салгалы, база-ла уруглар мөөрейлеринге янзы-бүрү шаңналдарны ап келгеннер. 2023 чылда Чолдуг «Россияның аныяк салымныглары» деп Ниити-россия мөөрейиниң тиилекчизи болган.
Тыва Республиканың Культура яамызының медээзи-биле.
«Шын» №17 2024 чылдың март 6
