Тыва Республиканың шериг комиссариадынга күскү келдириишкинге хамаарыштыр брифинг болуп эрткен. Аңаа Чазак Даргазының бирги оралакчызының хүлээлгезин күүседип турар Айдыс Сынаа болгаш ТР-ниң шериг комиссарының хүлээлгезин күүседип турар Евгений Терехов киришкеннер.
ТР-ниң Баштыңының 2024 чылдың сентябрь 23-те үндүргени 515-РГ дугаарлыг Айтыышкыны ёзугаар 19 муниципалдыг болгаш 1 республиканың шеригже келдириишкин комиссиязы ажылын эгелээн.
Күскү шериг келдириишкининиң үезинде, октябрь 1-ден декабрь 31-ге чедир, 700 ажыг шериг назылыг оолдарны чурттуң аңгы-аңгы шериг кезектеринче чорудар. Эң-не кол чүүл – эмчи шинчилгезин эки эрттирери. Кадык камгалал яамызының дужаалы-биле эргежок чугула эмчи комиссиязының составы тургустунган.
Шериг эрттирериниң хуусаазы ѳскерилбээн, 1 чыл хевээр. Шеригже чорупкан оолдар шупту РФ-тиң девискээринге албан-хүлээлгезин эрттирер. Россияның составынче чаа кирген субъектилерге, ТШО-га оларны киириштирбес.
Шериг оолдарның үштүң бир кезии ѳѳредилге талазынга баар болгаш амгы үениң чаа шериг техниказын ѳѳренир болгаш шериг учедунуң мергежилин алыр.
Шыырак спортчуларны белеткээр дериг-херекселдер-биле эки хандыртынган спортчу роталар тургузарын бо удаада база уламчылаар.
Күскү шериг келдириишкининиң онзагай чаартылгазы чүл дизе, комиссияларның ажылынга хамаарыштыр хомудалдарны киирип болур. Шериг комиссиязынга хамаарышкан хомудалды Күрүне ачы-дузазы таварыштыр электроннуг хевирге база киирип болур апарган. Оон аңгыда, хѳй хүлээлгелерлиг тѳп дамчыштыр база киирип болур.
Шеригже келдириишкиннерни саазын хевиринге чорудар. Ону шериг назылыг оолга бодунуң холунга тывыскаш, адын салдырар азы чагыг чагаалары-биле тарадыр.
Октябрь 15-тен тура «дорт телефон шугуму» ажылдап эгелээр. Ооң ажылы вторник, четверг хүннеринде болур. Аңаа Организастыг мѳѳңнээшкин эргелелиниң Чиңгине штавы тайылбырны кылып ажылдаар.
Шериг хүлээлгезин эрттирип каапкан, хуусаазы чедип келген шериглерни үе-шаанда албан-хүлээлгезинден хостааш, чандырар.
Н. КУУЛАР.
Айдыс СУНДУЙНУҢ тырттырган чуруу.
“Шын” №77 от 2024 чылдың октябрь 9
