Чылдың-на Россия девискээринге болуп турар «Күзелдер шивизи» акция эгезин салган. Ук акцияның кол сорулгазы – бичии уругларның күзелдерин бүдүрери. Акцияда киржип турар улуг кижи бүрүзү тус черлерниң чагырга бажыңында тургускан шивиден уругларның күзелдерин бижээн открытканы шилип алгаш, чаш кижиниң күзелин бүдүрер.
«Күзелдер шивизи» акцияның ачызында Сүт-Хөл кожууннуң 20 бичии чурттакчызының күзели бүдер. Оларның аразында тускай шериг операциязының киржикчилериниң ажы-төлү, өскүстер, кадыының байдалы кызыгаарлыг болгаш хөй ажы-төлдүг өг-бүлелерден оолдар-уруглар бар.
Сүт-Хөл кожууннуң чагырга даргазы Орлан Моңгуш ТШО киржикчизиниң 5-ки классчы уруу Надежда Ондарга спортчу костюмну, а кожууннуң саң-хөө эргелелиниң даргазы Экер-оол Моңгуш Кызыл-Тайга ортумак школазының 3-кү классчызы Ачыты Күжүгетке хүрежир хепти садар болганнар.
Сүт-Хөл кожууннуң Төлээлекчилер хуралының даргазы Андрей Хертек ТШО киржикчизиниң уруу Суг-Аксы сумузунуң чурттакчызы 10 харлыг Виктория Ооржактың күзелин бүдүрер болган. Бичии Виканың күзели – "Гусь обнимусь" деп сыртыкчыгаш.
Суг-Аксы сумузунуң Төлээлекчилер хуралының даргазы Якир Ондар Ишкин сумузунуң бичии чурттакчызы Августа Ховалыгның күзелин боттандырар. Августаның күзели – байырлалдың торту болгаш чуруттунар херекселдер.
Өөредилге эргелелиниң даргазы Алена Моңгуш Ай-Хаан Ондарга ыры-хөгжүм дыңнаар наушниктерни, а кожуун чагыргазының чолаачызы Түмен Доңгак Ак-Даштың бичии чурттакчызы Байсан Моңгушка коньки садар дээш оон-даа өске чаштарның күзелдерин улуг улус бүдүрер болган.
Айдың ОНДАР белеткээн.
Чурукту интернет четкизинден алган.
“Шын” №98 2023 чылдың декабрь 23
