Эрткен неделяда ТР-ниң Өөредилге яамызы эрткен чылдың түңнелдерин үндүрүп, үнүп келген чылда ажылының угланыышкынын бадылаары-биле коллегия хуралын эрттирген.
Өөредилге сайыды Орлан Соян 2025 чылда ажылының түңнелдерин таныштырып тура, республиканың өөредилге системазында чедип алдынган сорулгаларга доктааган. Олар дээрге:
📢 «Аныяктар болгаш уруглар» федералдыг төлевилелдиң ачызында туттунган болгаш септеттинген өөредилге албан черлери;
📢 Регионнуң төөгүзүнге хамаарышкан «Төрээн черивистиң төөгүзү» деп өөредилге ному. Федералдыг төлевилел-биле кылдынып турар Россияның регионнарында өөредилге номнарының аразында бо ном тергиин 10 номнуң бирээзи бооп шылгараан;
📢 Россияның «Чылдың башкызы» мөөрейинге Тываның төлээзи – хоорайжыттынган Каа-Хем суурнуң физика башкызы Айдаш Хертек тиилекчи номинант болган;
📢 Ортумак профессионал өөредилге сайзырадырынга болгаш республиканың экономиказын хөгжүдер кадрлар белеткээринге улуг ужур-дузалыг «Профессионалитет» федералдыг төлевилелдиң ажыл-чорудулгазы;
📢 «Сферум» платформазын ажыглалга киирбишаан, өөредилге албан черлериниң чурагайлыг сайзыралын чедип алыры;
📢 Федералдыг деңнелде бүгү Россияда эртип турар эртем олимпиадалары, конференциялар, төлевилелдер, янзы-бүрү мөөрейлерге киириштирбишаан, салым-чаяанныг уругларны болгаш аныяктарны деткиири.
«Эрткен чыл чеже-даа берге болза, салдынган сорулгалар шупту күүсеттинген» — деп, өөредилге сайыды Орлан Соян демдеглээн. Чылды түңнээн хуралга видеоконференция дамчыштыр РФ-тиң Чырыдыышкын яамызының регионнар-биле «ВК», «Сферум» талазы-биле ажылдаар удуртукчузу Дмитрий Силумов база киришкен. Ол Тывада МАХ-ты кайы хире ажыглай бергенин болгаш улаштыр сайзырадырының дугайында илеткелди кылган.
Оон аңгыда өөредилге сайыды Чаа чыл дыштанылгаларының эрткениниң дугайында айтырыгга доктаап, кожууннарның өөредилге эргелелдериниң начальниктериниң айтырыгларынга тодаргай харыыларны берген. Акша-шалың дугайында болгаш федералдыг яамының түңнел хуралынга чугаалашкан айтырыгларны таныштырган. Чаңчыл болган түңнел хуралга үнүп келген 2026 чылда кылып чорудар ажылының кол-кол сорулгаларын салып, күжениишкинниг ажылче удуртукчуларны кыйгырган.
Надежда КУУЛАР.
Чуруктарны Өөредилге яамызының парлалга албанындан алган.
“Шын” №3 2026 чылдың январь 29
