Кызыл кожууннуң төвү Каа-Хем суурнуң 1 дугаар школазындан 22 өөреникчи чалыы армейжилер одуруунче кирген. Ук болуушкун байырлыг байдалга болуп эрткен. Чалыы армейжилер өскелерден ылгалып турар демдектерлиг болганындан аңгыда, бичии болгаш элээди уругларның бүгү-российжи эң-не улуг хемчээлдиг шимчээшкининиң бүрүн эргелиг төлээлери апарганнар.
“Кайгамчыктыг болуушкун дээш, силерге байырны чедирип, алдар-хүндү болгаш чоргаарал-биле “чалыы армейжи” деп бедик атты тударыңарны, өөредилгеңерге болгаш спортчу чедиишкиннерни, хөй-ниити ажылдарынга идепкейжи болуруңарны күзедим” – деп, регионалдыг штабтың даргазы Айдың Шивидек чугаалаан.
Регионалдыг килдисте 6 муң ажыг чалыы армейжилер кирип турар. Чалыы армейжилерниң акы-дуңмалышкы бөлүү хүнден хүнче өзүп-көвүдээр болзун деп Айдың Шивидек йөрээген.