Тываның Баштыңы Владислав Ховалыг «Эльбрусметалл-литий» КХН-ниң чиңгине директору Евгений Балуков-биле ужурашкан. Компания 2027 чылда Тастыгның литий чыдынының болбаазырадылгазынга белеткенип турар.
Ужуражылга үезинде даг-тывыш адырынга кадрлар белеткелинче кичээнгейни угландырганын Владислав Ховалыг бодунуң блогунда дыңнаткан. «Бүдүрүлгеге кандыг кадрлар херегин сайгарып көрдүвүс. Ол дээрге чолаачылар, машинистер, септекчилер база инженерлер дээш 800 ажыг ажылчын мергежилдер-дир. Бо чылын 70 ажылчын олут ажыттынган, бистиң республиканың 64 чурттакчызы ында тургустунган. Олар амгы үеде ол орук участогунда ажылдап, Эрзин кожуунда мөөң чыдынче орук тудуунда хаара туттунган» – деп, республика Баштыңы демдеглээн.
«Эльбрусметалл-литий» компания социал ужур-дузалыг төлевилелдерни идепкейлиг боттандырып турар. Эрзин кожууннуң Качык суурда школа септелгезинге киришкен, Эрзин суурда спорт зал тудуун эгелээн.
Республиканың Өөредилге яамызы мергежилдиг специалистерни белеткээринге «Профессионалитет» федералдыг төлевилел-биле даг кластерин келир чылдан эгелеп хевирлээр ажылды чорудуп турар.
ТР-ниң Чазааның парлалга албаны.
“Шын” №92 2024 чылдың ноябрь 30
