Дугуржулга «Россия – арга-дуржулгалар чурту» президентиниң платформазы биле Тыва Республиканың Чазааның аразында үре-түңнелдиг кады ажылдажылганы тургузарынче угланган. Тываның Баштыңы Владислав Ховалыг биле «Россия – арга-дуржулгалар чурту» КхАН-ның чиңгине директору, “Сенеж” удуртулга мастерскаязының ректору Андрей Бетин документиде атты салганнар.
Ажыл-чорудулганың аңгы-аңгы адырларында аныяктарның хууда болгаш профессионал бот-хандырылгазынга аргаларны тургускан төлевилелдерни болгаш эгелээшкиннерни деткиир, ажыл-чорудулганың аңгы-аңгы адырларында салым-чаяанныг кижилерни илередир болгаш деткиир аргаларны тургузар болгаш сайзырадыр, салым-чаяанны сайзырадыр адырда тергиин арга-дуржулгаларны нептередирин хандырар сорулга-биле дугуржулга чардынган.
«Тыва – салым-чаяанныгларның сайзыралынга эрте-бурунгу чаңчылдары, байлак культурлуг өнчү-хөреңгизи болгаш кайгамчык бойдус байлаа-биле онзагай байдалды тургузуп турар тускайлаң регион. «Россия – арга-дуржулгалар чурту» платформа-биле дугуржулгага атты салыры дээрге, бичии школачыдан эгелээш, арга-дуржулгалыг дагдыныкчыга чедир чурттакчы бүрүзүнүң өзүлдезинге болгаш бот-хандыртынар аргаларын тып шыдаар кылдыр республиканың келир үезинге киирер үлүг-хуувус-тур. Уран чүүлге, эртемге, спортка, сайгарлыкчы чорукка болгаш оон-даа өске адырларга Тываның чурттакчыларының салым-чаяанын ажыдар байдалдарны тургузарын кызып турар бис. Бо дугуржулга чүгле документ болур эвес, а бистиң ужур-чаңчылдарывыстың чаа чедиишкиннеринге үндезин болур дээрзинге бүзүрел-дир. Тываның аныяктары маңаа, төрээн республиказынга, сайзырап, ооң чечектелиишкининге үлүг-хуузун киирип, а арга-дуржулгалыг чурттакчылар боттарының билиглерин, арга-дуржулгазын чаа салгалдарга дамчыдып бээрин күзээр бис. Кады ажылдажылга-биле Тываны оон-даа күштүг болгаш чедиишкинниг кылыптар бис» — деп, Тываның Баштыңы Владислав Ховалыг демдеглээн.
Ат салган документиде “Россия – арга-дуржулгалар чурту” президент платформазының төлевилелдерин болгаш мөөрейлерин Тыва Республикага организастап эрттирериниң база оларның киржикчилерин деткиириниң талазы-биле элээн каш адырларга бот-боттарынга бүгү талалыг деткимчени көргүзери айыттынган.
«Тыва Республиканың чурттакчыларының «Россия– арга-дуржулгалар чурту» президент платформазында идепкейи өзүп турар. Сөөлгү алды чылда регионнуң 108 муң ажыг чурттакчылары платформаның төлевилелдериниң, мөөрейлериниң болгаш олимпиадаларының киржикчилери апарган. Ат салган дугуржулга бот-боттарынга бүгү талалыг деткимчени саналдап, кады ажылдажылганың чедип алган деңнелин чүгле бедидер эвес, а салым-чаяанныг аныяктар-биле кады ажылдаарының чаа хевирлерин, мөөрейлерни, төлевилелдерни болгаш хемчеглерни эрттирерин саналдаар» — деп, “Россия – арга-дуржулгалар чурту” КхАН-ның чиңгине директору, “Сенеж” удуртулга мастерскаязының ректору Андрей Бетин онзалап демдеглээн.
Дугуржулга президент платформазының төлевилелдеринче болгаш мөөрейлеринче Тываның оон-даа хөй хамаатыларын хаара тудар сорулгалыг. Бо документиде регион Чазааның амгы мөөрейлерге тематиктиг номинацияларны тургузарының дугайында азы «Россия – арга-дуржулгалар чурту» платформаның тускай төлевилелдерин боттандырарының дугайында саналдарны тургузарының аргалары көрдүнген.
Оон аңгыда, аңгы-аңгы хевирлерде коммуникация адырында Тыва Республика биле «Россия – арга-дуржулгалар чурту» президент платформазының аразында кады ажылдажылганы идепкейлиг хөгжүдеринче угланган, массалыг информация чепсектеринге парлалга хемчеглериниң, “төгерик столдарның”, тускай төлевилелдерге болгаш мөөрейлерге чурттакчы чоннуң киржир аргаларын дыңнадырындан эгелээш, кады ажылдажылганың түңнелдерин сайгарарынга хөй-ниитиниң бодалдарын сайгарарынга удуртукчуларны чалаар.
РФ-тиң Президентизи Владимир Путинниң эгелээшкини-биле 2018 чылдың май 22-де «Россия – арга-дуржулгалар чурту» деп президент платформазы тургустунган. Платформаның ажылының үезинде Россияның 89 регионундан болгаш делегейниң 150 чурттарындан кижилер ооң төлевилелдериниң киржикчилери апарган.
Платформаның төлевилелдеринге, мөөрейлеринге, олимпиадаларынга болгаш өөредилге программаларынга киржилге чаңгыс үзел-бодалдыг кижилерни тып алырынга болгаш ажыктыг харылзааларны тургузарынга, дээди өөредилге черлеринче киреринге, кедилиг стажировканы эртеринге, күзээни ажылын тып, бурунгаар депшииринге, медиа-деткимчени, грантыны ойнап алырынга, бодунга дагдыныкчыны ап, мергежилин оон-даа бедидеринге болгаш удуртукчу шынарларын сайзырадырынга дузалаар.
«Россия – арга-дуржулгалар чурту» президент платформазының ажыл-чорудулгазының аайы-биле “Сенеж” удуртулга мастерскаязы тургустунган.
А. МОНГУШ.
Чурукту интернеттен четкизинден хоолгалаан.
«Шын» №9 2025 чылдың март 13