Тываның Баштыңы Владислав Ховалыг биле Моолдуң Увс аймактың губернатору дээрги Чулуун Чимэдтиң ажылчын ужуражыышкыны март 27-де Тыва Республиканың Чазааның бажыңынга болуп эрткен. Моол аалчыларны уткуп ап тура: “Бистиң ужуражыышкынывыс моон соңгаар кады ажылдажылганы улам сайзырадырынга ажыктыг болур” – деп, Владислав Ховалыг чугаалаан.
Ужуражыышкынга Россия Федерациязының Кызыл хоорайда Моолдуң чиңгине консулу дээрги Чимид Ганболд, Увс аймактың төлээлери, ол ышкаш Тыва Республиканың Чазааның кежигүннери киришкен.
Тываның Баштыңы Владислав Ховалыг биле Моолдуң Увс аймактың губернатору дээрги Чулуун Чимэдтиң ажылчын ужуражыышкынының үезинде тыва–моол экономиктиг болгаш культура харылзааларын хөгжүдериниң айтырыгларын чугаалашкан.
Россия биле Кыдаттың аразынга экономиктиг болгаш политиктиг кады ажылдажылга улам-на сырый апар чыдар амгы үеде Кыдатче Россияның “хаалгазы” апарып болур Тыва Республикага Моол-биле экономиктиг харылзааларны улам хөгжүдери алызы барып дыка ажыктыг. Регионнар аайы-биле алырга, Тыва биле Увс аймак эң ылаңгыя көдээ ажыл-агый адырынга кады чедиишкинниг ажылдап болур.
Малдың уксаажыдылгазынга, малдың эъдин, кежин, дүгүн болбаазырадырынга, чыжыргананы тарып өстүреринге болгаш болбаазырадырынга Тыва биле Увс аймак чедиишкинниг ажылдап болурун ужуражыышкын үезинде демдеглээн.
Тыва–моол кады ажылдажылганы сайзырадырынга российжи–моол кызыгаарның чоогунга, чиге айтырга, Өвүр кожуунга тускай экономиктиг зонаны тургузар деп шиитпирлээни дыка идиглиг боорун ажылчын ужуражыышкынның киржикчилери онзалап айытканнар.
Тыва биле Увс аймактың аразынга кады ажылдажылга дугайында дугуржулганы 2002 чылда чарган. Ол дугуржулганы Россия биле Моолдуң чазактарының аразында комиссияның Кызыгаар чоогунуң регионнар аайы-биле кады ажылдажылганың биче комиссияның 2023 чылдың апрель 3–4 хүннерде Улан-Удэ хоорайга болуп эртер хуралынга чаартып узадыр шиитпирни Тываның Баштыңы Владислав Ховалыг биле Моолдуң Увс аймактың губернатору дээрги Чулуун Чимэдтиң ажылчын ужуражыышкынының түңнелинде хүлээп алган.
/ Бистиң корр.
Буян ООРЖАКТЫҢ тырттырган чуруктары.
"Шын" 2023 чылдың март 29 №22
#Шын #Тыва #ТываныңБаштыңы #Увс #ТываМоолхарылзаалар #Кадыажылдажылга
