Беларусь Республиканың Красноярск хоорайда элчин чериниң удуртукчузунуң чоокта чаа томуйлаткан сүмелекчизи Игорь Бук Тывага аалдап кээрге, ТР-ниң Баштыңы Владислав Ховалыг ооң-биле ажыл-агыйжы ужуражылганы кылган.
Садыг-саарылга, экономика талазы-биле ийи регионнуң кады ажылдажылгазының байдалын өөренип көргеш, аграрлыг комплекс болгаш культура, спорт, туризм талазы-биле эштежилгени күштелдирер дугайында дугурушкан. Ол ышкаш студентилер солчулгазын шуудадырын база чугаалашкан.
«Эрткен чайын Беларусь биле Тываның аразынга керээ чардынган турган. Бо хүн садыг-саарылга тос катап өскен. Ону ам-даа өстүрер бодалдыг бис. Белорусс эштерниң дуржулгазын көдээ ажыл-агыйывыстың продукцияларын болбаазырадырынче киириштирери кедилиг деп санап тур мен. Культура, спорт, туризм талазынче база кичээнгейни угландырар дугайында дугуруштувус» – деп, Владислав Ховалыг бодунуң блогунда демдеглээн.
Тыва Республика кайы-даа адырга хамаарыштыр ажык чугаага белен дээрзин белорусс талага Владислав Ховалыг сагындырган.
Ийи республиканың аразында кады ажылдажылга 2021 чылда, Беларусь делегацияның Тывага кээп чораанындан, эгелээн дээрзин сагындыраал. 2023 чылда ук эштежилгеден орулга 9 катап өскен. 2021 чылда Беларусь республиканың элчин чериниң удуртукчузу турган Александр Позняков «Красноярск-Белаз Сервиз» компаниязының төлээлери-биле кээп чораан.
2022 чылда Тыва Республиканың делегациязы Беларусь Республикага аалдап четкеш, тус черниң Президентизи Александр Лукашенко болгаш Гродненск облазының күүсекчи комитединиң даргазы Владимир Караников-биле ужурашкан.
Ооң соонда 2023 чылдың июнь 27-де болган Россия чергелиг шуулганга Тыва болгаш Беларусь республикалар садыг-саарылга, экономика, эртем-техниктиг болгаш социал-культурлуг кады ажылдажылганың дугуржулгазынга атты салган. Амгы үеде ол-ла дугуржулгага делегей чергелиг харылзааларны немээр дугайында ажылдарны кылып чорудуп турар.
Бистиң корр.
Чуруктуинтернеттен алган.
"Шын" №54 2024 чылдың июль 20
![](https://shyn.ru/media/cache/2024/07/21/rxxq0fh6jbe-62b114a653.jpg)