“Кадыкшыл маршруду” 10 харлаан
Сентябрь 20-де Орус культура төвүнге "Кадыкшыл маршруду" мобильдиг бригада албанының тургустунганындан бээр 10 чылынга тураскааткан конференция болуп эрткен.
Байырлыг хемчег ТР-ниң кадык камгалал сайыдының оралакчызы Марианна Кууларның байыр чедириишкини-биле эгелээн. Ол Республиканың хөй-ниитиниң кадыкшылы болгаш медицина профилактиказының төвүнүң коллективинге болгаш мобильдиг бригаданың специалистеринге быжыг кадыкшылды, ажыл-мергежилинге чедиишкиннерни күзевишаан, шылгараңгай ажылдакчыларны шаңнаан.
Ооң соонда чыылганнарга байыр чедирип профилактика төвүнүң улуг эмчизи Айдың Серен-оол сөстү алган. Ылаңгыя чедери берге кожууннарже үннүүшкүннерни онзалавышаан, ук адырның эргежок чугулазын, ажыктыын ол демдеглээн. Мобильдиг медицина бригадазының ачызында янзы-бүрү аарыгларны эге чадазында тодарадып, кожуун болгаш республика эмнелгелеринге немелде шинчилгелер эртеринче чорудуп турарын Айдың Серен-оол чугаалаан.
Ол ышкаш "Кадыкшыл маршруду" мобильдиг бригаданың мугур харлааны-биле Мөңгүн-Тайга, Тожу, Сүт-Хөл, Бай-Тайга кожууннарның төп эмнелгелери, 1 дугаар республика эмнелгези болгаш Республиканың медицина колледжизиниң төлээлери байырын чедирген.
Мобильдиг бригаданың хоочуннарының аразындан "Кадыкшыл маршруду" улуг улус албанының хөй чылдарда удуртукчузу, РКДЦ-ниң маммолог эмчизи Урана Хомушку база бодунуң коллегаларынга чылыг-чымчак сөстерни бараалгаткан.
Конференцияның пленарлыг кезээнге бригаданың чедиишкиннерин, нарын айтырыгларын болгаш келир үезин ооң киржикчилери сайгарып чугаалашкан.
Республиканың кадыкшылга төвүнүң улуг эмчизиниң оралакчызы Наталья Агапова "Кадыкшыл маршрудунуң" 10 чыл дургузунда ажылының, ооң тургустунуп келген төөгүзүнүң, угланыышкыннарының болгаш мобильдиг бригаданың ажылының түңнелдериниң дугайында илеткээн. Мөңгүн-Тайганың болгаш Тожунуң төп эмнелгелериниң улуг эмчилериниң чедери берге ыраккы кожууннарга мобильдиг бригаданың чонга эмчи дузазын чедирип турганының дугайында илеткелдери кончуг солун болган.
Бригаданың кардиолог эмчизи Солангы Монгуш бодунуң илеткелинге медицина бригадазының ажылчын үнүүшкүннер үезинде хан-дамыр системазының аарыгларындан аарып чоруур кижилерге тускай консультативтиг медицина дузазын чедирип турары кончуг чидиг айтырыгны шиитпирлеп турарын демдеглээн. "Кадыкшыл маршруду" төлевилелдиң эндокринологтуг аарыглардан аарып чоруур кижилерге консультативтиг дузаны чедимчелиг дузаның чедирип турарының дугайында кадык камгалалының хоочуну, эндокринолог эмчи Белекмаа Монгуш илеткээн.
Ол ышкаш "Кадыкшыл маршрудунуң" мугур харлааны-биле Красноярск хоорайда коллегалары база байырын чедирип, видео таварыштыр Красноярск крайда үнүүшкүннер кылып турар мобильдиг бригадаларның арга-дуржулгазы-биле үлешкен.
Улуг улусту хүлээп ажылдап турар "Кадыкшыл маршруду" мобильдиг медицина бригадазы 2015 чылдан тура бодунуң ажылын Республиканың хөй-ниитиниң кадыкшылга болгаш медицина профилактиказының төвүнүң баазазынга ажылдап эгелээн. Амгы үеде бригадада 8 тускай эртемниг эмчи, 4 ортумак эмнелге ажылдакчызы, оон ыңай 2 рентген-лаборант, 3 чолаачы ажылдап турар. Ол ышкаш кожууннарның төп эмнелгелеринче чагыг ёзугаар үнүүшкүннер кылырда, республиканың өске-даа эмнелгелеринден тускай эртемниг эмчилер хаара туттунар.
Он чыл дургузунда мобильдиг бригаданың эмчилери республиканың бүгү кожууннарынче 400 ажыг үнүүшкүннерни кылып, 100 муң ажыг чурттакчыны шинчип, 40 муң ажыг шинчилгелерни кылган.
Мобильдиг медицина бригадазының ажылының түңнели-биле алырга, тускай медицина дузазын алыры чедимчелиг апарган. Тускай эмчи дузазы хереглээн кижилер кожууннарның төп эмнелгелеринге болгаш кожууннар аразының медицина төптеринге дузаны ап болур. Ол ышкаш чоннуң кадык амыдыралче чүткүлү оттуп, бодунуң кадыынга хумагалыг апарганы-биле профилактиктиг хемчеглер эртеринче чоннуң хей-аъды көдүрлүп, санитар-чырыдыышкын ажылдарынче чоннуң келири көвүдээн.
Ч.СААЯ белеткээн.
“Шын” №73 2024 чылдың сентябрь 25
