Апрель 11-де Тыва Республиканың күүсекчи эрге-чагырга органнарының ажылдакчыларының аразынга чылдың-на болуп эртер “Кадык чарыш — кадык кадрлар” деп марафон болуп эрткен. Марафоннуң киржикчилери 2,5 км дистанцияга чарышкан. Ол ышкаш Совет Тываның 5 чыл аттыг стадионунга эстафетага база маңнашканнар.
Спортчу хемчегниң бо хевири 2 дугаар болуп эртип турар. Эрткен чылын ону “Кадыкшыл чылынга” хамаарыштыр эрттиргеш, эки деп үнелээш, улаштыр база чаңчыл кылдыр эрттирер деп түңнелге келгеннер. Шак мындыг ховар дээн спортчу байырлал кадык амыдыралче чүткүп чоруур кижилерни каттыштырар, кадык амыдыралче чурттакчы чоннуң кичээнгейин хаара тудар арга апарган.
Марафонга киржири-биле тус черниң эрге-чагырга органнарының кежигүннери назы-хар барымдаалавайн чыглып келгеннер. Келген кижи бүрүзүнүң сорулгазы чогуур хемчээлди маңнап, кадык амыдыралды деткиири дээрзин организакчылар демдеглээн.
Киржикчилер аразында “Россия Федерациязының чарыжы”, “Тиилелгениң чарыжы”, “Күш-культуржунуң чарыжы”, “Кадык чарыш – кадык кадрлар” дээш оон-даа өске чарыштарның доктаамал киржикчилери, чаа чаржып эгелеп чоруурларга чедир кымны чок дээр.
2,5 км чарышка эр улус аразынга Спорт яамызының төлээзи Каң-Демир Оюн 8,17 минутага халып кирип келгеш, тиилекчи болган. Тываның информастыг технологиялар техникумундан Күдерек Сандак 8,41 минутада келгеш, ийиги черни алган. Чонну ажылга хаара тудар төптүң төлээзи Аяс Иргит 9,38 минутада келгеш, үшкү черге төлептиг болган. Дөрткүзүнден онгу черге чедир шаңналдыг черлерни Кадык камгалал яамызының төпчүткен бухгалтериязындан Орлан Монгуш, республиканың психиатрия эмнелгезинден Чиңгис Чөржей-оол, Тываның информастыг технологиялар техникумундан Күдер Аракчаа, Арга-арыг ажыл-агый яамызындан Олег Саяты, 2 дугаар республика эмнелгезинден Чиңгис Бүдегечи, Санаашкын болгаш отчёт эргелелинден Түмен-Байыр Далай-оол, Спорт яамызындан Эрес Аптыы олар алганнар.
Херээжен улус аразындан ТР-ниң Өөредилге яамызының төлээзи Лилия Сотпа тиилээн. Ийиги черге кеш болгаш шээр аарыглар диспансеринден Сылдысмаа Сангы-Бадраа келген. Үшкүзүн Спорт яамызындан Юлиана Ондар алган. Дөртен онгу черге чедир черлерни 2 дугаар Республика эмнелгезинден Олча Ендан, “Кеш болгаш шээр аарыглар диспансеринден” Сайдана Сат, Тываның информастыг технологиялар техникумундан Айнаш Салчак, Арга-арыг ажыл-агый яамызындан Диана Сарай, Саң-хөө яамызындан Айза Хуурак, Орук шимчээшкинин организастаар төптен Алдынай Шаравии биле Долаана Бады алганнар.
Күүсекчи эрге-чагырга органнарының аразынга ниити эстафетага республиканың кеш болгаш шээр аарыглар диспансери тиилээн. Ийиги черге Спорт яамызы, үшкүзүн Тываның информастыг технологиялар техникуму, дөрткүзүн 2 дугаар республика эмнелгези, бешкизин Өөредилге яамызының саң-хөө хандырылга төвү, алдыгы черни Арга-арыг ажыл-агый яамызы алган. Чонну ажылга хаара тудар төп болгаш республиканың психиатрия эмнелгези чедиги черни алган. Сески черге Саң-хөө яамызы, тоскузун Кадык камгалал яамызының төпчүткен бухгалтериязы, онгузун СПИД болгаш халдавырлыг аарыглар-биле демисел болгаш профилактика төвү алган.
“Кадык чарыш – кадык кадрлар” марафону анаа-ла спортчу хемчег эвес, а кижи бүрүзүн бодунуң кадыкшылынче кичээнгейни угландырар, ол дээш сагыш човаар, үргүлчү шимченип чоруурунче кыйгырган демдек болган. Кадык чурттакчы чон дээрге-ле келир үеде күрүнениң сайзырап, чечектелири-дир дээрзин организакчылар демдеглээн: “Шак мындыг хемчеглер чоннуң кадыкшылче сонуургалын оттуруп, спорт-биле өңнүктежиринге улуг идигни берип турар. Кижи бүрүзү чүгле боду дээш эвес, а чуртувустуң келир үези дээш кадык болуулуңар”.
Чыжыргана СААЯ.
Чуруктарны спортчу хемчеглер эргелелинден алган.
«Шын» №15 2025 чылдың апрель 24
