Февраль 12-де Кызылда Аныяктар ордузунга ТР-ниң Кадык камгалал яамызының коллегиязының хуралы болуп эрткен. Ол хуралга республиканың кадык камгалал адырының эрткен 2024 чылда ажылының түңнелдерин, 2025 чылда ажылының кол угланыышкыннарын сайгарып чугаалашкан. Республиканың кадык камгалал адырының кылып чоруткан ажылын, келир үеде сорулгаларын түңнеп чугаалажыры-биле чергелештир, кадык камгалалының эмнелге черлери боттарының чедиишкиннериниң делгелгезин организастааннар.
Коллегия хуралының үезинде кол кичээнгейни “Кадык камгалалы” национал төлевилелдиң боттандырыышкынынче угландырган. Ол дээрге чурттакчы чоннуң кадыының камгалалының баштайгы звенозун чаартыр, аңаа медицинаның чаа технологияларын ажыглаар арганы бергенин республиканың кадык камгалал сайыды Анатолий Югай демдеглээн. 2024 чылда Тывада кадык камгалалының дөрт объектизин туткан, беш эмнелге черлерин септээн, 10 медицина автотранспорту болгаш эмнелгениң чаа 30 дериг-херексели-биле хандыртынган.
Тывада чаш ажы-төлдүң төрүттүнери хөй болуп артпышаан, эрткен чылда 5600 чаш төрүттүнген, ол дээрге Россияның регионнарының аразында бедик көргүзүг. Эрткен чылда диспансеризация эрткен кижилерниң саны көвүдээнин, 228480 кижи эрткенин, ол дээрге 2023 чылдыынга деңнээрге, 5 муң кижи болганын, чурттакчы чон ооң ужур-дузазын биле бергениниң херечизи деп коллегия хуралынга демдеглээн. 2024 чылда Тываже Россияның өске регионнарындан эмчилерниң чанып кээп турары көвүдээни база эки чүүл болган, ол дээрге ТР-ниң Чазааның талазындан эмчилерге көргүскен деткимчениң эки түңнели. Медицинаның дээди өөредилге черлеринче аныяктарны тускай сорулгалыг өөредип чорудары көвүдээн. 2024 чылда дээди өөредилге черлеринче 182 кижини өөредип чоруткан, оларның 150-ин специалитетче, 32-зин ординатураже. Дээди эртемниг 50 эмчи, ортумак эртемниг 118 эмчи эмнелгелерде ажылдай берген.
Кадык камгалалының баштайгы звенозун чаартыры-биле 2025 чылда “Узун болгаш шимченгир чуртталга” деп национал программаны боттандырып эгелээр.
Ш. ЛОПСАН белеткээн.
“Шын” №5 2025 чылдың февраль 13
