«Кадык камгалалы» национал төлевилелдиң чорудуу-биле Тываның эмнелге албан черлеринде телемедицина консультацияларының саны чылдан чылче көвүдеп турар. Бо чылдың 11 айларының дургузунда профиль аайы-биле 1626 консультацияны чоруткан.
2023 чылда «Кадыкшылдың маршруду» губернатор төлевилели-биле эмчилер бригадалары 14879 шинчилелдерни кылган. Республиканың кожууннарынче, ооң иштинде ыраккы Мөңгүн-Тайга, Тожу, Тере-Хөл кожууннарже, ниитизи-биле 51 үнүүшкүннү кылган.
Бо чыл дургузунда Тываның 16 эмнелгезиниң автопарктарын 28 чаа, тускай автомобильдер-биле долдурган.
2023 чылда 2500 уругга көрдүнген санаторлуг курорт эмнээшкини-биле 3061 уругну хандырган.
Бо чылдың 11 ай дургузунда республика бюджединиң акшаландырыышкыны-биле 205,98 сая рубль түңнүг 49337 рецептиниң халас эмнерин 13064 чиигелделиг хамаатыга берген.
Республиканың 1 дугаар эмнелгези бо чылдың 11 ай дургузунда нейрохирургия, арын-чаак, чүрек-дамыр хирургиязының, офтальмологияның, урология, травматология база ортопедия талазы-биле 1012 бедик технологиялыг кезиишкиннерни кылган.
Бо чыл дургузунда 7 муң ажыг эмнелге ажылдакчылары немелде өөредилгени эрткен. Эмнелге ажылдакчылары федералдыг өөредилге албан черлеринге база республиканың медицина албан черлериниң баазазынга билиин бедиткен.
«Кадык камгалалының бирги звенозунуң чаартылгазы» деп программа-биле 2023 чылда Тываның медицина албан черлерин 113 эмчи дериг-херекселдери-биле дерээн. Ооң 101-ин кожуун эмнелгелеринче чоруткан.
Адынай СОЯН белеткээн.
Чуруктарны интернеттен алган.
«Шын» №100 2023 чылдың декабрь 30
