ТР-ниң Медицина палатазының организастааны-биле Улусчу чогаадылга бажыңынга «Кадык камгалалының Даңгыназы болгаш Тажызы–2023» деп мөөрей болуп эрткен. Ооң эрттирип турар сорулгалары – эмнелге ажылдакчыларының чогаадыкчы салым-чаяанын илередири, хей-аъдын база сагыш-сеткилин көдүрери.
«Кадык камгалалының Даңгыназы болгаш Тажызы–2023» деп бедик атты Тес-Хем кожууннуң төп эмнелгезиниң эпидемиолог эмчизи Буян Маадыр-оол база «Алдан» клиниказының эмнелге бүрүткекчизи Нояна Мижит чаалап алганнар. Оларның соонда «1-ги чергениң Тажызы» деп атка «Алдан» клиниказының эмнелге бүрүткекчизи Сыдымчы Күжүгет, «1-ги чергениң Даңгыназынга» Чөөн-Хемчик кожууннуң төп эмнелгезиниң халдавырлыг аарыглар эмчизи Маакай Кара-Сал төлептиг болган. «2-ги чергениң Даңгыназы болгаш Тажызы» деп аттарга психиатрия эмнелгезиниң санитары Алаш Ондар, дүрген дуза чедирер болгаш хай-халап медициназының төвүнүң фельдшери Селенга Монгуш шылгараан.
Ук мөөрейге бо чылын хууда болгаш күрүнениң эмнелге албан черлеринден 20 эмчи киришкен.
ТР-ниң Кадык камгалал яамызың медээзинден Чаяна ШИЛОВА белеткээн.
Чуруктарны интернет четкизинден алган.
"Шын" №41 2023 чылдың июнь 7
