“Чурттаар оран-сава болгаш хоорай хүрээлеңи” национал төлевилелдиң “Хоорай хүрээлеңинге таарымчалыг байдалды тургузары” федералдыг төлевилел-биле Кызыл хоорайның Иркутская кудумчузунда Эмчилер аллеязының тудуу адакталып турар. Ук төлевилелди Тываның Медицина палатазы саналдап киирген соонда, эрткен чылын чурттакчы чоннуң бадылаашкынының түңнелинде тиилекчилер санынче кирген.
“Эмчилер аллеязының” девискээриниң шөлүнүң кыдыгларында бордюрларны салган, ногаажыдары-биле хөрзүннү эккелген, тротуарлар болгаш сценаның шалазын чадар ажылдар дооступ турар.
Бо девискээрни чаагайжыткаш, “кызыл зонага” ажылдап турган маадыр эмчилерге болгаш Тываның кадык камгалалының баштайгыларынга тураскаалды тургузар. Төлевилелдиң авторларының бодап турары-биле алырга, бо аллея медицина ниитилелиниң профессионал хемчеглерин байырлыг байдалга организастаар, агаарлаар болгаш дыштаныр чер болур.
Бистиң корр.
"Шын" №55, 2023 чылдың июль 26