Кызыл хоорайда Улусчу фронтунуң оран-савазында тускай шериг операциязының киржикчилеринге дуза кадары-биле техника шывыгларын даарап турар эки турачыларның ажылын сонуургап четтивис. Ажыл кидин түлүк чоруп тур.
«Чайгы үеде ногаан оът-сиген аразынга машина-техниказын шып алырга, дайзын көрбейн барзын дээш, тускай шывыгларны Кызыл хоорайның хоочуннары болгаш волонтерлары даарап турарывыс бо. Бодум хуумда бо айның 11-ден эгелеп эки турачы өөрүмде каттыжа бердим. Дуза кадар күзелдиглер хостуг үезинде келгеш, үлүг-хуузун киириштирипкеш, чоруптар чорду. Оларның аразында студентилер, башкылар, эмчилер, культура ажылдакчылары, хоочуннар дээш кандыг-даа улус бар. Чамдык уруглар материалды ап алгаш, бажыңнарынга-даа даарап эккеп турар. Келгеш, кезер чүүлдү кезип, даараар чүвени даарап турар херээжен улус база дыка хөй. Элчип-солчуп чоруп турарлар. Дузалаар улус кээп турда, а бир чамдыызы чоруптар» — деп, Полина Моңгуш чугаалады.
Күзелдии-биле хүннүң-не кээп, дааранып турар хоочуннар дээрге-ле эриг баарлыг иелер-дир. Олар чүгле шывыглар эвес, бөрттер, дискектээштер, белдириктерни база аргып, даарап турар. Амгы үеде аргыттынар хендирниң төнгени-биле ол ажыл турупкан. Ынчангаш деткикчилер-даа, ажылчын холдар-даа ам-даа херек дээрзин демдеглээш, буянныг үүле кылыксааннарны демнежиринче кыйгырдылар.
Бөрт аргыыр хендирни ногаан өңнүг болгаш кургаг хөвеңден кылган болур ужурлуг. Чүге дээрге ол бөрттерни шериг бөрттүң иштинден кедер. Хөвең бөрт кижиниң дерин сиңирип алыр, чылыг база болур. Ынчангаш Тывадан барган оолдарга камгалал база болзун дээш, бөрттерни аргып турар бис деп чугааладылар.
Эки турачы иелерниң чугаалап турары-биле алырга, ие кижи дааранып, аргыттынып олургаш, йөрээл сөстерин сымыранып, «Кадык-шыырак болзун, багай чүүлдерге таварышпазын, дириг ээп чанып келзин!» – деп, сеткилинден йөрээп олурар. Ынчангаш камгалал болзун дээш, боттарының шыдаар шаа-биле дузалажып турары дээрге-ле, фронтуга кончуг улуг деткимче. «Тиилелге бистии болзун!» деп, олар йөрээп олурар.
Ада-чурттуң Улуг дайынының үезинде тыва чон алгы-кештен тоннар, хол хаптары, чүвүрлер даарап чораан болза, үениң аайы-биле бо удаада көңгүс өске материалдардан идик-хепти, херек чүүлдерни даарап, аргып турар дээрзин демдеглээри артык эвес.
Айдың ОНДАР.
Ада ТЮЛЮШТУҢ тырттарган чуруктары.
"Шын" №56, 2023 чылдың июль 29