Ноябрь 3-те республиканың Чазак бажыңының баарынга чаа автомобильдер дүлгүүрлерин тыпсыр байырлыг езулал болган.
2021 чылдың май 2-де РФ-тиң Президентизи В. Путинниң Чарлыының 9 дугаар чүүлүнде кирип турар айыткалының боттанып турары ол. Ук чүүлде 2021–2023 чылда көдээ суурларга болгаш бичии хоорайларга 5 муңдан эвээш эвес дүрген дуза чедирер чаа автомобильдерни ажыглалче киирериниң дугайында бижээн.
Хүндүлүг, чонум! Улуг байырлалдың бүдүүзүнде республикавыстың кожууннарында төп эмнелгелерге болгаш дүрген дуза чедирер черлерге чаа автомобильдерниң дүлгүүрлерин байырлыг байдалга тыпсып турарывыс бо. Шак мындыг өөрүнчүг болуушкун национал төлевилелдиң ачызында бо чылын бисте ийи дугаар боттанып турары ол. Автопарк чаартыр ажыл мооң-биле доозулбас, ам-даа уламчылаар. Бо чаа автомобильдер Тываның агаар-бойдузунга, оруктарынга кончуг таарымчалыг. Чаа транспорттуң ачызында, тус черлерге дүрген дуза чедирер талазы-биле ажылдарның шынары улам экижиир дээрзи билдингир. Ажыл-агыйыңарга чаа техниканың немешкени-биле байыр чедирип тур мен!» — деп, ТР-ниң Баштыңы Владислав Ховалыг чугаалаан.
Республиканың медицина-катастрофа дүрген эмчи дуза чедирер төвүнге, Таңды, Мөңгүн-Тайга, Тере-Хөл, Тожу, Өвүр, Чөөн-Хемчик, Сүт-Хөл, Чаа-Хөл кожууннарның төп эмнелгелериниң дүрген дуза чедирер черлеринге ниитизи-биле 10 чаа автомобильдиң дүлгүүрлерин тывыскан.
«Дүрген дуза черинде сес дугаар чыл чолаачылап ажылдап тур мен. Бо дээрге ийи дугаар чаа автомобиль ап турарым бо-дур» — деп, Өвүр кожууннуң төп эмнелгезиниң дүрген дуза чедирер чериниң чолаачызы Мерген-Херел Моңгуш чугаалады.
Сүт-Хөл кожууннуң дүрген дуза чедирер чериниң чолаачызы Эрес Ооржак: «Чаа автомобильдер ам-даа кээп-ле турар болзун! Техника экиде чолаачыларның-даа ажылы чиигээр, эмчилерге-даа, эмчи дузазы хереглээн чонга-даа эптиг байдалдарны тургузары техникадан хамаарылгалыг. Дүрген дуза чедирер төпте 20 ажыг чыл ажылдадым. Бистиң оруктарывыска бо ап турарывыс ышкаш автомобильдер кончуг таарымчалыг. Чаа чычааннар дээш, четтирдивис!»
Өвүр кожууннуң төп эмнелгезиниң улуг эмчиниң хүлээлгелерин күүседип турар Май-оол Сат:
– Чаа автомобильдер ап турар 10 кожууннуң аразынче киргенивиске аажок өөрүп тур бис. Чаа техника алыр дугайында чагыгны эрткен чылын киирген турган бис. Кадык камгалал сайыды Анатолий Константиновичиге болгаш ТР-ниң Баштыңы Владислав Товарищтайовичиге кожууннуң төп эмнелгезиниң өмүнээзинден четтиргенивисти илередип тур бис. Өвүрнүң төп эмнелгезинге алды автомобиль турган чүве, бо дээрге чеди дугаары-дыр. 2023 чылда ийи дугаар чаа техника ап турарывыс бо. Ажылывыска дыка улуг деткимче-дир, ынчалза-даа бүдүн кожуунну чеди автомобиль хандырып шыдавас. Ам-даа чаартылгалар болур дээрзинге идегел бар. Кышкы үеде Торгалыг, Ак-Чыраа, Чаа-Суур чедери дыка берге. Ол оруктарга бо чаа автомобиль тура дүшпейн халдыр боор оң.
Айдың ОНДАР.
Буян ООРЖАКТЫҢ тырттырган чуруу.
“Шын” №84 2023 чылдың ноябрь 4
