Улуг-Хем кожууннуң Эъжимде күрүне грантызы алган Сергек Мижит-Доржунуң өг-бүлези Калмык Республикадан тевелерни эккелген. 18 кыс, 2 ийи харлыг эр тевелер Улуг-Хем кожуунга өзүп көвүдээр. Совет үеде Эъжимге тевелерниң саны 300 чедип турган болза, амгы үеде 30 четпес теве арткан.
«2023 чылдың эгезинде «Агростартап» грантызын чаалап алган бис. 20 тевени хары угда садып алыр ажыл-агый тывары ындыг амыр эвес болду. Чижээлээрге, Бурят Республикада тевениң баш саны эвээш болганындан оларны сатпайн турар» — деп, деткимче алган Сергек Мижит-Доржу чугаалаан.
Чүгле Калмык Республиканың «Полынный» көдээ ажыл-агыйы Тываның фермеринге тевелерин садарын чөпшээрээн. Ынчангаш Сергек Мижит-Доржу оларга өөрүп четтиргенин илереткен. Мал-маган чүдүреринге таарымчалыг болзун дээш, тускай дериг-херексел-биле дерээн техникага тевелерни чүдүргеш, орук дургаар доктаап, садып алган малын дышкарып чорааш, сес хонуктуң дургузунда, Тывага чедип келгеннер. Амгы үеде тевелерниң байдалы эки. Бир ай иштинде олар карантинде.
Теве дүгүнден кылган продукция аймаан чүгле Тывада эвес, а Россияның өске-даа регионнарында аажок үнелээр боорга Мижит-Доржуларның өг-бүлези теве азыраар деп шиитпирлээн. Амдыызында теве дүгүн Эйлиг-Хемде цехче дужаар, а кажан азыраан малының баш саны өзүп, көвүдей бээрге, дүктен продукция бүдүрер дериг-херексел садып алыр деп фермер Сергек планнап турар.
Көдээ черде чурттап, тус черниң ажыл-агыйы-биле амыдыралы холбаалыг азы ам эгелээр деп планнап турар РФ-тиң хамаатызы «Агростартап» күрүне грантызының деткимчезин алыр эргелиг. Бо чылын Тываның 12 хамаатызы ук төлевилелдиң деткимчезин алган.
ТР-ниң Чазааның медээзинден А. ОНДАР белеткээн.