РФ-тиң Президентизиниң эгелээни федералдыг программаның иштинде 2022 чылда регионнуң 27 школазы капитал септелгени чорудар ужурлуг. Каа-Хем кожууннуң Ильинка биле Бүрен-Бай-Хаак суурларының школалары бо чылын чагыгны киирген турган. Ук школалар капитал септелге чорударынга белеткел ажылдарын эгелээн. Ажылдың хүлээникчилери тодарадаттынган. Удавас капитал септелгени эгелээр.
Тываның өөредилге сайыды Алексей Храмцов Каа-Хем кожуунга ажылчын хуралды эрттирген. Аңаа кожууннуң чагырга чериниң төлээлери, Ильинка биле Бүрен-Бай-Хаак школаларының директорлары болгаш ажылдың хүлээникчилери киришкеш, ажыл-агый дугайында чугаалашкан.
«Федералдыг программа-биле септелге чорудар ужурлуг 27 школаны бодум барып көрүп чоруп тур мен. Септелге ажылын хүлээнир организацияларны тодарадып алган бис. Кожуун болгаш суму даргалары болгаш 27 школаның директорлары-биле, тудугжулар-биле ужуражылганы чоокку үеде эрттирер мен» – деп, Алексей Храмцов демдеглээн.
А. ОНДАР белеткээн.