Май 6-да Сүт-Хөл кожууннуң Кара-Чыраа сумузунга Тиилелгениң 78 чылдаан оюнга уткуштур 26 дугаар Кара-Бай аттыг хөл шыдыраа маргылдаазы болуп эрткен. Маргылдааны фронтуга тыва чоннуң материалдыг дуза чедирип эгелээни, баштайгы «Кызыл коштуң» 81 чыл болган оюнга база удуртукчуларның бирээзи Ынаажык Ооржакка (шолазы Кара-Бай) тураскаадып эрттирген. Аңаа Барыын-Хемчик, Каа-Хем, Чөөн-Хемчик, Сүт-Хөл кожууннарның шыырак 22 шыдыраачылары күжүн шенешкеннер.
Швейцар чурум-биле эрткен маргылдааның түңнелинде бирги, ийиги черлерни Чадаана хоорайдан келген Айдың Ондар (6,5 санныг) база эрткен чылын бо маргылдаага тергиидээн Тываның үш дакпыр чемпиону база Наадымнарның үш дакпыр тиилекчизи Орлан Сарыглар (5,5 санныг) чаалап алыр аргалыг болганнар. Сүт-Хөлдүң шыдараачызы Метке Адыг-оол үшкү көргүзүглүг болган. Олардан аңгыда, эң улуг назылыг киржикчи Сегбе Ондарга (83 харлыг), Севил Донгакка, Айда-Сай Донгакка тиилелгеже чүткүлү дээш хүндүлел бижиктер, өртектиг белектерни тывыскан.
ЭЛЭЭДИ СПОРТЧУЛАРНЫҢ ЧЕДИИШКИННЕРИ
Россияның Кубогунга киржир эрге дээш май 3–8 хүннеринде Барнаул хоорайга 9 хардан 17 хар чедир оолдар, уруглар аразынга шилилгелиг шыдыраа маргылдаазының баштайгы чадазы швейцар чурум-биле болуп эрткен.
Кызыл хоорайда Өөредилге төвүнүң шыдыраа тренери Сергей Тюлюштуң удуртулгазы-биле бистиң республикадан 18 ойнакчы ол маргылдаага чедиишкинниг киришкеннер. 15 харлыг уруглар аразынга эң эки түңнелди Арина Иргит көргүскеш, 2 дугаар черни алган.
Дидим, чараш оюннарны дараазында элээди спортчулар көргүскеннер: 11 харга чедир Херел Эртине — 4, 13 харга чедир Начын Чамзы 6 дугаар черлерни алганнар; кыс уруглар аразынга маргылдаада бир дугаар киржип турар 7 харлыг ойнакчылар Амелия Бадыраа база Амелия Оюн 9 харга чедир ойнакчылар аразынга 9 сандан 5 санны ап, тергиидээннер.
Кубоктуң финалынга ойнаар эрге дээш шилилгелиг маргылдаалар чоокку үелерде Омск база Абакан хоорайларга болур. Өзүп олурар мерген угаанныг бичии шыдыраачыларга база ада-иелеринге, деткикчилеринге чедиишкиннерни күзедивис.
ПРОКУРОР ШЫДЫРААЧЫЛАР
Республиканың прокуратуразы Тиилелгениң 78 чыл оюнга тураскаадып, Сибирьниң 12 девискээринден 40 прокурор аразынга онлайн хевирге 7 салыглыг шыдыраа маргылдаазын эрттиргеннер. Шииткекчи Арат Ондарның дыңнадып турары-биле, эң хөй 13 ойнакчы Красноярск крайдан, эң улуг ойнакчы Хакасиядан Александр Матросов болган. Маргылдааның түңнелинде эр ойнакчылар аразынга Красноярск крайдан Алексей Дианов 7 салыгдан 7 санны алгаш, 1 дугаар черни алган. 2–3 дугаар черлерни Алтай Республикадан Павел Абрамов, Кемерово областан Игорь Юришин алганнар.
Херээжен ойнакчылар аразынга 1-ги черге ФИДЕ-ниң спорт мастери Валерия Минчей, 2-ги черге Буяна Ховалыг (иелээ Тывадан), 3-кү черге Наталья Полежаева (Хакасиядан) төлептиг болганнар.
Тыва Республиканың прокуратуразының удуртулгазы шупту ойнакчыларга база шииткекчи Арат Ондарга четтиргенин илереткен.
/ Алексей ЧАМБАЛ-ООЛ.
"Шын" №34 2023 чылдың май 13
