Тыва Республиканың найысылалы Кызылдың девискээринге июнь 16-да суггур чайыктыг, хаттыг чаъс чагган. Ооң уржуунда хоорайның чамдык микрорайоннарынга электри энергиязы-биле хандырылга үзүктелген. Электри энергиязы-биле хандырылганы катап тургузар дээш, энергетиктер кандыг хемчеглерни алганын, канчаар ажылдаанынга хамаарыштыр кыска тайылбырны «Россети Сибирь Тываэнергонуң» чиңгине директору Антон Лукин кыска тайылбырны массалыг информация чепсектеринге берген.
Ооң чугаазы-биле алырга, хаттыг суггур чаъс үезинде электри шугумунга релелиг камгалал ажылдап, үрелиишкин болган участоктарга электри энергиязы дамчыырын соксаткан. Камгалалдың ындыг хевири хоорайның ниити электри четкизин камгалаар арганы берип турар. Үрелиишкиннер болган шугумнар илереттинген соонда, дораан-на септелге ажылдары баш бурунгаар көрдүнген чурум ёзугаар эгелээн. Аңаа 28 кежигүннүг, 9 санныг техникалыг 9 бригаданы хаара туткан.
Бай-Хаак кудумчузунда электри шугумунга септелге ажылдары 11 шак дургузунда уламчылаан, июнь 17-ниң эртен электри энергия-биле хандырылга катап тургустунган. Ленин, Кочетов, Дружба, Красноармейская, Рабочая, Рихард Зорге, Чүргүй-оол, Каа-Хем, Мугур, Интернациональная, Комсомольская, Тыва эки турачылар, Чүлдүм, Кузнецов, Крылов кудумчуларга септелге ажылдарын энергетиктер 12 шак 35 минута дургузунда кылгаш, чырык-биле ол кудумчуларда бажыңнарны хандырган.
Кызыл болгаш Каа-Хем кожууннарда Шамбалыг, Кур-Чер, Бүрен-Хем, Кундустуг, Суг-Бажы суурларга септелге ажылдарын шалыпкын чоруткаш, оларның чурттакчы чонунга электри чырыын берген.
Агаар-бойдустуң таарымча чок байдалдарындан болгаш өске-даа чылдагааннар-биле республиканың электри энергиязының четкилеринге үрелиишкиннер болур болза, энергетиктер хемчеглерни дүрген алырынга кезээде беленин Антон Лукин чугаалаан.
Электри энергиязынга чоннуң хереглели хөй эвес Совет Эвилелиниң үезинде туткан четкилерниң күчүзү чоннуң янзы-бүрү техниканы калбаа-биле ажыглап турарынга күш четпейн турарын «Россети Сибирь Тываэнергонуң» чиңгине директору Антон Лукин сагындыргаш, амгы үеде Тываның электри четкилериниң дериг-херекселдериниң 79 хуузу эргилээнин дыңнаткан.
Моон соңгаар Тываның электри четкилери үрелиишкиннер болгаш үзүктелиишкиннер чок ажылдаарынга энергетиктер магадылалды берип шыдавазын А. Лукин чугаалааш, 2025 чылда инвестиция программазының акшаландырыышкыны элээн кызырылганын дыңнаткаш, республиканың чурттакчы чону электри энергиязы-биле үзүктел чок хандыртынган болзун дээш, бар-ла аргаларны ажыглап, кызымак ажылдап турарын демдеглээн.
Ш. ЛОПСАН.
Чурукту интернет четкизинден хоолгалаан.
“Шын” № 23 2025 чылдың июнь 19