Тываның билдингир спортчузу, чоннуң ынак мөгези Маадыр Монгуш чоок кижилеринден чарлып чоруткан. Тываның Баштыңы Владислав Ховалыг мөгениң чоок кижилеринге ханы кажыыдалын илередип, дараазында одуругларны бодунуң блогунга демдеглээн:
«Чоннуң ынак мөгези Маадыр Монгуш кезээ мөңгеде бистен чарлып чоруткан-дыр. Ооң дугайында кажыыдал сөстери бижиири бүзүренчиг эвес. Чүге дээрге ол чаа-ла 54 харлыг турган болгай.
Маадыр Кавааевич — эрес-дидим чоруктуң, езулуг тыва эрниң овур-хевирин илереткен кижи. Күчү-күш, мерген угаан, хүн бүрүде бодунуң мага-боду дээш ажылдаары, чаагай чаңчылдарын сагыыры ооң амыдыралының овур-хевири. Аныяк спортчуларга амыдыралды чаартып, бодунуң ынак чүүлүн кылып эгелээри кажан-даа орай эвес дээрзин бодунуң үлегер-чижээ-биле көргүскен дагдыныкчы. Алдар-аттыг мөге, биче сеткилдиг кижизиг кижи деп Тываның чону ону хүндүлээр. Бистиң шуптувуска канчаар-даа аажок улуг чидириг-дир.
Маадыр Кавааевичиниң чоок кижилеринге, төрелдеринге ханы кажыыдалымны илередип тур мен. Арзылаң мөгени төлептии-биле сөөлгү оруунче үдээр даалганы Республиканың Спорт яамызынга бердим» — деп, ТР-ниң Баштыңы бодунуң блогунда демдеглээн.
Чуруктарны интернет четкизинден алган.
