ТР-ниң Баштыңы Владислав Ховалыг Юрий Валерьевич Кара-оолдуң хенертен бо чырык өртемчейден чарлып чорутканынга кажыыдалын илередип, дараазында чүүлдү бодунуң блогунга демдеглээн:
- Москва хоорайже кыска хуусааның дургузунда сургакчылап чорупкан үемде, дуржулгалыг депутат, офицер, хөй-ниитижи Юрий Валерьевич Кара-оолду бо чырык өртемчейден чарлып чоруткан дугайында муңгаранчыг медээни алдым.
Аныяктарның патриотчу кижизидилгезинге ооң киирген үлүг-хуузу улуг. Дайын-чааның киржикчилериниң хей-аъдын көдүрүп чораан ролю чүнүң-биле-даа деңнеттинмес. Кончуг берге 1990 чылдарның үезинде бодунуң дайынчы болгаш чаңгыс аай үзел-бодалдыг эштери-биле ол ажылды организастап эгелээн турган. Амгы үеде «Акы-дуңмалышкы чорук» хөй-ниити организациязы бедик деңнелде. Дыка хөй аныяктарга үлегерин көргүзүп чоруур хөй-ниитижи организация апарган.
Бодумнуң болгаш Тыва Чазактың, Тываның хөй янзы нациялыг чонунуң өмүнээзинден Валерий Ховалыговичиге, Анай Балчыровнага, Леонид Валерьевичиге, Шолбан Валерьевичиге болгаш чоок кижилеринге, эш-өөрүнге ханы кажыыдалымны илереттим.
Тыва Чазактың Аппарадынга болгаш Дээди Хуралда коллегаларынга төрелдериниң чөпшээрели-биле хамааты хөөржүдүлге езулалын организастап, чаңгыс чер чурттуувусту сөөлгү оруунче төлептиг үдээрин даастым.
