Тываның күрүне университединиң башкы институдунга башкының болгаш дагдыныкчының чылынга тураскааткан «Тергиин студент - 2023» деп мөөрей болуп эрткен. Мөөрейни башкы институдунуң директору, экономика эртемнериниң кандидады Валериана Ликтанның мугур харлаанынга база тураскааткан.
Мергежилиниң аайы-биле чогаадыкчы маргылдаа, боттарының чедиишкиннерин көргүзер болгаш үнелиг арга-дуржулгазын удур-дедир солчур шөлчүгеш Тываның улустуң чогаалчызы А.А. Даржай аттыг Кызылдың башкы институдунуң студентилеринге боттарының мергежилин хевирлээр кончуг-даа улуг арганы тургускан.
Мөөрейге ниитизи-биле 12 студент аңгы-аңгы угланыышкыннарга киришкен. Ук хемчег май 3-тен эгелеп чада аайы-биле болуп эрткен. Мөөрейниң киржикчилери башкы институдунуң баазазынга боттарының чедиишкиннериниң болгаш сонуургалдарының дугайында чугаалавышаан, ниити культуразының деңнелин, эскериглериниң делегейин бараалгадып, боттарын таныштырган.
Чаңчыл ёзугаар мөөрейниң база бир кол шылгалдазы школага кичээлдер эрттирери болган. 30-не минута дургузунда студент кижи өөреникчилер-биле харылзааны тудуп апкаш, кончуг солун болгаш чедимчелиг кылдыр кичээлдиң темазын тайылбырлаар ужурлуг.
Эртемниң методиктиг деңнелин, технологтуг болгаш коммуникативтиг культуразын болгаш эстетиказын мөөрейниң киржикчилери Кызыл хоорайның 11 дугаар школазынга кичээлдер эрттирип тургаш көргүскен.
“Эге школага өөредилге” болгаш “Информатика” талазының студентилериниң кичээлдери кончуг солун хевирге эрткен. Дөрт дугаар курстуң студентизи Чайзат Сайды сан кичээлинде чаа аргалар-биле ажылдап билирин болгаш бедик деңнелге белеткенгенин көргүскен.
Ийиги курстуң студентизи Александр Ондарның “Долгандыр делегей” кичээли хөй талалыг болгаш кончуг онзагай болган. Бирги курстуң студентилери Айыраң Монгуш, Найдана Ондар, Оргаадай Балдан олар технология кичээлдерин эрттирип тургаш, өөреникчи биле башкының кады ажылдажылгазын организастаар амгы үениң чаа аргаларын боттандырып шыдаан.
Кичээлдер аразында канчаар-даа аажок улуг сагыш-сеткил хайныышкынын оттуруптар, “чаңгыс тыныш-биле” эртип турар кичээлдер бар болган. Ол дугайын Психология болгаш педагогика талазында өөренип турар 3-кү курстуң студентизи Адина Домур-оолдуң элээди уругларга эрттиргени " Angrychildren азы халдаашкынны канчап ажып эртерил" деп психология кичээли бадыткаан.
Кызыл хоорайның 37 дугаар уруглар садының баазазынга база ажык кичээлдерни эрттирген. “Школа назыны четпээн уруглар өөредилгези”, “Немелде (хөгжүм) өөредилге”, “Школа назыны четпээн кадыы кызыгаарлыг уруглар өөредилгези” деп угланыышкыннарның студентилери институтка өөренип тургаш алгн билиглерин көргүскен.
Вероника Финогенованың, Азиана Хертектиң, Сырга Иргиттиң эрттирген кичээлдери кончуг чедиишкинниг болган. Мөөрейниң ийи хүнү, аткан ок дег, сыыңайнып эрте берген. Студентилер боттарының мергежилиниң үзел-бодалын көргүзүп, арга-дуржулгазы болгаш чаа-чаа идеялары-биле үлешкен. Эң-не кол чүүл башкы кижиниң арга-мергежилин херек кырында көргүскени болур.
“Кызылдың башкы институдунуң эң тергиин студентизи- 2023” деп мөөрейниң бүгү-ле киржикчилерин шылгараңгай болгаш салым-чаяанныг деп эксперттер үнелээн. Мөөрейниң тиилекчихи 2-ги курстуң студентизи Александр Ондар болган. Ооң дагдыныкчы башкызы “Школа назыны четпээн болгаш эге школа назылыг уруглар өөредилгезиниң педагогика болгаш методиказы” кафедраның башкызы Ия Монгуш. Республиканың аңгы-аңгы булуңнарының школаларында болгаш уруглар садтарында башкының доостурган студентилери боттарының мергежилин төлептии-биле көргүзүп, улуг-биче чонга ачы-буянын чедирип чоруурлар.
Дээди өөредилге черлеринден тура-ла шак мындыг хемчеглерни эрттирип турары келир үеде өөредилге адырынга боттарының ажылын тергиин эки билир башкылар немежир дээрзи чугаажок.
Чыжыргана СААЯ.
